Marga rak í rogastans þegar þekkt fólk brá á leik í Áramótaskaupinu með aðstoð gervigreindar, þar á meðal sjálfur Hemmi Gunn, sem lést fyrir áratug. Mikil umræða hefur orðið um notkun gervigreindar í framhaldinu. Kastljós rifjaði upp Skaupið og kíkti að tjaldabaki í þessu umtalaða atriði.

Stefán Ólafsson, lektor í tölvunarfræði við Háskólann í Reykjavík, Helga Þórisdóttir, forstjóri Persónuverndar, og Páll Rafnar Þorsteinsson, heimspekingur og verkefnastjóri við Siðfræðistofnun Háskóla Íslands, komu í framhaldinu í myndver og ræddu ýmis álitamál tengd gervigreind og notkun hennar.

Fyrstu þrjá daga ársins hefur markaðshyggjunni verið gefið verðskuldað frí á meðan svokallað Auglýsingahlé hefur staðið yfir á skiltum bæjarins. Myndlistin hefur tekið yfir ríflega 400 skilti og skjái fyrirtækisins Bilboard en þetta er í þriðja sinn sem það, Y gallerí og Listasafn Reykjavíkur standa að verkefninu. Haraldur Jónsson, myndlistarmaður, var valinn að þessu sinni með verk sitt Ummyndanir, sem síðan bætist við safneign Listasafns Reykjavíkur.