Gunnar Þórðarson, einn ástsælasti og afkastamesti tónlistarmaður og lagahöfundur landsins er látinn 81 árs að aldri. Ólafur Páll Gunnarsson tók saman smá virðingavott um Gunnar úr safni RÚV.
Eins og síðastliðnar vikur fengum við til okkar hagyrðing sem hefur búið til fyrri part úr fréttum vikunnar sem hlustendum gefst tækifæri á að botna. Hagyrðingur vikunnar er Sigurlín Hermannsdóttir fyrrum ritstjóri þingræðna á upplýsinga- og útgáfusviði Alþingis.
Fyrriparturinn er:
Í Mosfellsbænum minkaher
marserar um dalinn.
Norðurlandamót hestamanna hefst á mánudaginn. Landsliðsknapar Íslands taka að sjálfsögðu þátt og eru í þetta sinn 21 talsins. Það er þannig að ef íslenskur keppnishestur fer úr landi á hann ekki afturkvæmt hingað að móti loknu. Hluti knapa fer því út og keppir á hestum sem þau fá lánaða erlendis. Ísólfur Líndal Þórisson landsliðsþjálfari var á línunni hjá okkur.
Í gær bárust fréttir af því brotist hafi verið inn í minkabú í Mosfellsdalnum. Fjöldi minka, sem hleypur á hundruðum ef ekki þúsundum, var hleypt út og líklegt er að ekki munu allir nást í hús aftur. Lögreglan á höfuðborgarsvæðinu rannsakar málið á Dalsbúi sem innbrot. Róbert Arnar Stefánsson, líffræðingur og forstöðumaður Náttúrustofu Vesturlands fór yfir skaðann sem þessi slepping mun hafa á vistkerfið í Mosfellsdal og nánasta umhverfi.
Mjög óformleg rannsókn leiddi í ljós að sá tónlistarmaður sem spilar mest um verslunarmannahelgina er Aron Can. Hann mun koma fram á Neistaflugi í Neskaupstað, Þjóðhátíð í Eyjum og Ein með öllu á Akureyri. Við heyrðum í Aroni hvernig undirbúningur fyrir helgina gengi og hvernig hann ætli að láta þetta ganga upp.
Bíll valt af veginum upp að Bolafjalli í gær. Betur fór en á horfðist og enginn slasaðist alvarlega en myndir sína að bíllinn var eins og kramin áldós eftir veltuna. Kristinn Gauti Einarsson starfandi bæjarstjóri Bolungarvíkur var á línunni.
