Velferð og vistvænar samgöngur

Markvisst er unnið að því að skapa gott starfsumhverfi þar sem líðan í starfi og starfsánægja er í forgrunni. Einnig er lögð áhersla á að starfsfólk njóti sveigjanleika eins og kostur er til að samræma starf og einkalíf. Innleidd var fjarvinnustefna á árinu þar sem markmiðið er að stuðla að auknum sveigjanleika í starfi og auka fjölbreytni í starfsumhverfi í þeim störfum þar sem það er mögulegt. Stytting vinnuvikunnar tók gildi í upphafi árs í samræmi við samkomulag sem náðst hafði við fulltrúa stéttarfélaga um útfærslu.

Ferlar í eineltis- og áreitnimálum voru uppfærðir líkt og gert er ráð fyrir með árlegri endurskoðun. Viðhorf starfsfólks til margra þátta í vinnuumhverfinu voru greind í viðhorfskönnun í loks árs og unnin verða úrbótaverkefni í framhaldi af þeim niðurstöðum.

Margt var gert á árinu til að styðja við markmið um velferð starfsfólks. Sálfræðiþjónusta til starfsmanna var efld enn frekar og einnig hafið samstarf við aðila sem sérhæfa sig í ráðgjöf til starfsfólks vegna langvarandi álags og streitutengdra vandamála.
Hugað var sérstaklega að hreyfingartengdum heilsuviðburðum. Sett var af stað gönguáskorun á vormánuðum þar sem stillt var upp dagskrá um mánaðarlegar göngur í kringum vötn, á láglendi og á fell með ágætis þátttöku starfsfólks. Verðlaun voru dregin úr potti mánaðarlega fyrir þá sem kláruðu markmið hvers mánaðar og samhliða var myndasamkeppni úr myndum sem teknar voru í göngunum.

Margir fræðslufundir voru á dagskrá á árinu sem fjölluðu um velferðartengd efni, svo sem álags- og streitustjórnun, næringu, samskipti, langtímaárangur í hreyfingu og sorg/sorgarviðbrögð. Sérstök fræðsla var veitt til fréttafólks vegna álagsþátta í störfum tengdum fréttaflutningi.

Boðið var áfram uppá nudd á vinnutíma en til viðbótar var boðið upp á velferðartengda viðburði þegar það var mögulegt í ljósi samkomutakmarkana. Þannig fengu RÚV-arar t.d. að kynnast rjúkandi fargufu sem er sambland af sauna – og sjóbaði ásamt því að eiga kyrrðarstund í flotmeðferð.

RÚV býður starfsfólki sínu upp á íþróttastyrk og starfsfólk er hvatt til að gera samgöngusamning um vistvænar samgöngur. Til að styðja við markmið um vistvænar samgöngur er boðið upp á hjólastillingar og yfirferð hjóla á vorin.

Hlutfall starfsfólks sem nýtir íþróttastyrk: 49% – Hlutfall starfsfólks sem nýtir samgöngustyrk: 25%

Þróun þekkingar

Lögð er áhersla að byggja upp hæfni og styrkja starfsfólk í þeim fjölbreyttu hlutverkum sem eru innan RÚV. Starfsmannasamtöl eru nýtt fyrir endurgjöf og sem vettvangur til að ræða starfsþróun. Starfsfólk allt styður við mikilvægt hlutverk almannaþjónustumiðils sem rýnir samfélagið, segir mikilvægar sögur og þróar nýjar leiðir til miðlunar.

Á árinu var stigið mikilvægt skref við innleiðingu stafræns fræðlukerfis sem gefur starfsfólki kost á að sækja fræðsluefni þegar það hentar því best. Í boði eru fjölmörg stutt og hnitmiðuð fræðsluerindi auk þess að kerfinu er ætlað að vera mikilvæg upplýsingaveita til starfsfólks um ýmis mannauðstengd mál. Fræðslaí kerfinu gegnir einnig þýðingarmiklu hlutverki í nýliðaþjálfun.
Fræðslufundir á áriu voru að mestu haldnir í fjarfundi, m.a. námskeið í skyndihjálp sem tókst ágætlega að útfæra með þeim hætti. Örfundir um málfar voru haldnir reglulega yfir árið og einnig voru staðnámskeið haldin í öryggismálum.

Í samstarfi við EBU voru haldnir nokkrir fræðslufundir sérstaklega fyrir starfsfólk RÚV með sérfræðingum starfandi á almannaþjónustmiðlum í Evrópu, t.d. um falsfréttir og hlaðvörp.

Aukin tæknifærni er lykilatriði fyrir fjölbreyttari miðlun og stigin voru skref á árinu til áframhaldandi þróunar, svo sem með því að efla tæknifærni dagskrárgerðarfólks í útvarpi með þjálfun í sjálfkeyrslu í tengslum við nýtt hljóðver.

Jafnrétti, jafnræði og þátttaka

Unnið hefur verið að árangri í jafnréttismálum á RÚV með margvíslegum hætti. Jafnlaunakerfi sem fer eftir jafnlaunastaðlinum ÍST 85:2012 fékk fyrst vottun í febrúar 2019 og árlega hefur verið framkvæmd viðhaldsúttekt. Kerfið hefur verið í stöðugri þróun og jafnlaunagreiningar sem gerðar voru á árinu sýnir að náðst hefur góður árangur í að minnka launamun kynja og var leiðréttur launamunur 1,3% (körlum í óhag) í sept. 2021.

Jafnréttiáætlun var gefin út í sept. og gildir til ársins 2024. Áætlunin miðar að því að jafna stöðu kynja en nær einnig yfir jafnrétti óháð öðrum þáttum í samræmi við lög nr. 86/2018 um jafna meðferð á vinnumarkaði. Stofnuð var jafnréttisnefnd sem ætlað er að fylgja jafnréttisáætluninni eftir, auka samráð í jafnréttismálum og tryggja að samstaða sé um jafnréttisstarf á vinnustaðnum.

Nefndin fundaði reglulega á árinu og miðlarði upplýsingum um störf sín til útvarpsstjóra og starfsfólks RÚV. Jafnréttismál á RÚV fengu umfjöllun á ráðstefnu Jafnvægisvogarinnar, hreyfiaflsverkefni FKA, forsætisráðuneytisins og nokkurra fyrirtækja, þ.m.t. RÚV.

RÚVara lífið

Samkomutakmarkanir settu svip sitt á árið og var minna um félagslíf starfsfólks af þeim sökum en þó voru farnir ýmsar leiðir til að halda gleði og góðum anda. Starfsmannasamtökin héldu loks árshátíð sem fresta hafði þurft í nokkur skipti og haldin var í Perlunni við góða þátttöku. Haldnir voru einnig fjarviðburðir, s.s. páskabingó ofl.