Fjárhagsleg áhrif COVID-19 voru ekki mikil í rekstri RÚV á árinu. Strax í upphafi faraldursins settu stjórn og stjórnendur af stað viðbragðsáætlun þar sem lögð var áhersla á bæði öryggi starfsmanna og að RÚV gæti sinnt hlutverki sínu sem almannaþjónustumiðill. Þannig var húsnæði RÚV skipt í sóttvarnahólf og það starfsfólk sem hafði tök á að vinna í fjarvinnu gerði það. Með uppskiptingu í sóttvarnahólf fylgdi þörf fyrir fleira starfsfólk vegna tvöfaldra vakta. Vel gekk að verja starfsemi RÚV og tryggja þannig órofinn rekstur þess í samræmi við öryggisáætlanir. Vel var fylgst með þróun innheimtumála en vanskil vegna krafna jukust ekki sem neinu nemur. Þrátt fyrir samkomutakmarkanir gekk starfsemin vel fyrir sig. Stjórnendur telja að áhrif COVID-19 muni ekki hafa veruleg áhrif á rekstur fyrirtækisins til lengri tíma.

Á árinu 2021 var áfram lögð áhersla á lykilþætti samkvæmt gildandi stefnu RÚV, þar á meðal á leikið innlent sjónvarpsefni, dagskrárefni fyrir börn og ungt fólk og þróun nýrrar þjónustu og dreifileiða. Mikil áhersla var einnig lögð á upplýsingamiðlun til almennings, miðlun menningarefnis í ljósi samkomutakmarkana, ræktun andlegrar og líkamlegrar heilsu og afþreyingarefni af ýmsum toga. Þá var lögð rík áhersla á fjölbreytileika í öllum miðlum, jafnræði og virka þátttöku og sýnileika allra hópa. Stórt skref var stigið árið 2021 þegar táknmálstúlkun allra aðalfréttatíma sjónvarpsins hófst sem og táknmálstúlkun Krakkafrétta. Aukin upplýsingamiðlun á ensku og pólsku á vef RÚV er einnig liður í þessu verkefni og margt fleira mætti nefna.

Hér má sækja ársreikning RÚV ohf. fyrir árið 2021