Safnadeild RÚV 

Í safni Ríkisútvarpsins er varðveitt mikið magn sjónvarps- og útvarpsefnis allt frá upphafi útsendinga árið 1930. Óhætt er að segja að Ríkisútvarpið hafi skráð nútímasögu þjóðarinnar og að mikilvægur hluti þeirrar sögu sé geymdur í söfnum Ríkisútvarpsins. Þar á meðal eru sannkallaðar þjóðargersemar þar sem efni af öllu tagi er varðveitt. Má þar nefna upptökur af daglegu lífi Íslendinga á þessum tíma, upptökur frá stærstu viðburðum í sögu þjóðarinnar og ómetanlegar heimildir af merku fólki og merkum listviðburðum. Umfang þessa safnaefnis er mikið og er unnið að því jafnt og þétt að skrá það og yfirfæra á stafrænt form. Efni úr safni hefur í auknum mæli verið dagskrársett í nýjum spilara og aðgengi þannig aukið að eldri upptökum í útvarpi og sjónvarpi. Safnið er opið almenningi alla virka daga og hægt að hlusta og horfa á eldri upptökur í húsakynnum RÚV.   

Á árinu var undirritaður samstarfsamningur við Almannaróm um þróun máltækni fyrir íslensku og nýtist efni úr safni RÚV til að kenna vélum að læra og skilja íslenskt mál. Þá fékk Ríkisútvarpið á árinu samþykki Þjóðskjalasafns Íslands fyrir rafrænni skjalavörslu og rafrænum skilum á skjölum. Það mun einfalda allan frágang á málakerfi fyrirtækisins í náinni framtíð.   

Málfar

RÚV hefur ríkar skyldur við íslenskt mál og í málstefnunni er málrækt í fyrirrúmi. Málfarsráðgjafar sinna yfirlestri og ráðgjöf og stuðla þannig að því að bæta íslenskufærni og auðga málfar starfsfólks. Daglegar ábendingar og fundir um málfar eru liður í þeirri starfsemi og umfang yfirlestrar hefur aukist jafnt og þétt á undanförnum árum. Málfarsráðunautur og málfarsráðgjafar sinna líka upplýsingagjöf og fræðslu um íslenskt mál í vikulegu spjalli í Morgunútvarpinu á Rás 2, Málfarsmínútunni í Samfélaginu á Rás 1 og þættinum Orð af orði sem hefur verið á dagskrá Rásar 1 í hverri viku frá 2013. 

RÚV English

Í stefnu RÚV til 2021 er kveðið á um að bæta skuli aðgengi innflytjenda. RÚV English birtir fréttir á ensku og heldur úti vikulegum spjallþætti á ensku, The Week in Iceland, um fréttir liðinnar viku á Íslandi á rúv.is. Í haust var RÚV English í samstarfi við Borgarbókasafnið um miðlun frétta til innflytjenda og nefndust þeir viðburðir The Week in Iceland at the Library. RÚV English heldur utan um þýðingar á völdu íslensku sjónvarpsefni sem birtist með texta á RÚV 2 og rúv.is og í fyrsta sinn var enskur þulur í útsendingu Eurovision á rúv.is. 

Eftirfarandi texti birtist í skýrslu félagsmála- og jafnréttisráðherra 2015-2017:

Á undanförnum misserum hefur RÚV haft jafnréttismál í forgrunni í allri sinni starfsemi og náð marktækum árangri. Á árunum 2014 og 2015 voru hlutföll karla og kvenna jöfnuð í yfirstjórn RÚV, í hópi millistjórnenda og umsjónarmanna í allri dagskrá RÚV, í útvarpi og sjónvarpi.

Skýr markmið og nákvæm greining

Liður í jafnréttisvinnu RÚV er samræmd skráning á kynjahlutfalli viðmælenda sem tekin var upp 1. desember 2015 birt er opinberlega á þriggja mánaða fresti. Skráðir eru viðmælendur í fréttum og fréttatengdum þáttum og í reglubundnum innlendum þáttum í útvarpi og sjónvarpi. Talning sem þessi gefur ekki heildarmynd af því hver birtingarmynd karla og kvenna er í dagskránni en hún er mikilvægur liður í því að mæla hver staðan og þróunin er. RÚV hefur markvisst staðið fyrir ýmsum aðgerðum til að hvetja konur til þátttöku á sviðum sem þær hafa ekki verið jafnar körlum m.a. námskeiði í íþróttafréttamennsku fyrir konur, námskeiðum í spurningatækni fyrir Gettu betur og kynjakvóta í liðum í Gettu betur. Þessar aðgerðir báru góðan árangur.
RÚV setti sér skýr markmið um að ná jafnvægi milli kynja í hópi viðmælenda. Markmiðið er að það séu algerlega jöfn kynjahlutföll í allri dagskrá allra miðla, að tekin séu viðtöl við jafnmargar konur og karla. Fréttir endurspegla samfélagið sem við búum í og í því samfélagi er því miður ekki enn jafnvægi á milli kynja í valdastöðum, t.a.m. í stjórnmálum og stjórnunarstöðum í atvinnulífinu. Því þótti óraunsætt að setja jafn ströng viðmið fyrir fréttir og aðra dagskrá. Sett var það viðmið að hlutfall kvenna sem viðmælenda í fréttum á ársgrundvelli yrði yfir 35% á árinu 2017 og myndi svo vaxa jafnt og þétt á næstu árum.

Gott jafnvægi milli kynja í dagskrá RÚV 2019

Skráðir eru viðmælendur í fréttum og fréttatengdum þáttum og í reglubundnum innlendum þáttum í útvarpi og sjónvarpi. Talning sem þessi gefur ekki heildarmynd af því hver birtingarmynd karla og kvenna er í dagskránni en hún er mikilvægur liður í því að mæla hver staðan og þróunin er.

Hlutfall kynjanna í dagskrá RÚV, utan frétta, var alveg jafnt, 50% karlar og 50% konur. Með kynjajafnvægi í dagskrá sker RÚV sig frá flestum miðlum hérlendis og erlendis. Séu eingöngu fréttatímar og fréttatengdir þættir teknir saman er hlutfall viðmælenda 63% karlar og 37% konur. Það skýrist af hærra hlutfalli karla í leiðandi stöðum í stjórnmálum og samfélaginu, sem fluttar eru fréttir af.  Tölurnar hafa þróast í átt til jafnvægis frá því að mælingar hófust.

Jafnlaunavottun

Stjórnendur hafa einnig unnið markvisst að því að eyða út kynbundnum launamun sem er nú kominn vel undir 2% og hlaut RÚV gullmerki jafnlaunaúttektar PwC vorið 2016, fyrst fjölmiðla. Jafnlaunakerfi hefur verið byggt upp og RÚV hlaut í kjölfar þess jafnlaunavottun og heimild Jafnréttisstofu til að nota jafnlaunamerkið.