Velferð og vistvænar samgöngur

Stigin voru enn markvissari skref á árinu til að styðja við markmið um velferð starfsfólks. Unnið var áfram samkvæmt fjarvinnustefnu með það að markmiði að auka sveigjanleika í þeim störfum þar sem það er mögulegt. Sálfræðiþjónusta til starfsmanna var efld frá fyrra ári og boðið upp á sérstaka ráðgjöf hjá markþjálfa til starfsfólks vegna langvarandi álags og streitutengdra vandamála. Heilsuvísitala starfsfólks lækkaði aðeins á milli ára sem skýrist af hversu hátt hlutfall starfsfólks veiktist af covid-19 fyrri hluta árs 2022. Yfirvinnutölur lækkuðu aðeins á milli ára og áfram verður unnið að því að draga úr yfirvinnu eins og kostur er.

RÚV býður starfsfólki sínu upp á íþróttastyrk og starfsfólk er hvatt til að gera samgöngusamning um vistvænar samgöngur.

Hugað var að hreyfingartengdum heilsuviðburðum; þátttöku í Lífshlaupinu, Hjólað í vinnuna og átakinu Syndum. Hvatt var til þátttöku og hvatningarverðlaun veitt. RÚVurum var boðið í spinning undir öruggri stjórn tónlistarstjórans Sigga Gunn og einnig var hlaupið saman við nokkur tilefni. Verulegar endurbætur voru gerðar á aðstöðu fyrir starfsfólk sem kemur hjólandi til vinnu. Til að styðja við markmið um vistvænar samgöngur er boðið upp á hjólastillingar og yfirferð hjóla á vorin.

Nudd á vinnutíma hefur fest sig í sessi og  RÚVarar héldu áfram að njóta hinnar rjúkandi fargufu sem hefur verið vinsæll viðburður; sambland af sauna og sjóbaði.

Fræðsla og ferlar

Fræðslufundir voru á dagskrá á árinu sem fjölluðu um velferðartengd efni, svo sem vinnuaðstöðu og áhrif á stoðkerfi, langtímaárangur og markmiðasetningu er varðar heilsu, húmor og jákvæð samskipti.

Ferlar í eineltis- og áreitnimálum voru uppfærðir líkt og gert er ráð fyrir með árlegri endurskoðun og fræðsluerindi á dagskrá um birtingarmyndir og viðbrögð við einelti og áreitni á vinnustað. Viðhorf starfsfólks til margra þátta í vinnuumhverfinu voru greind í viðhorfskönnun í loks árs og unnin verða úrbótaverkefni í framhaldi af þeim niðurstöðum. Hlutfall starfsfólks sem nýtir íþróttastyrk: 56% – Hlutfall starfsfólks sem nýtir samgöngustyrk: 37%.

Umhverfis- og loftlagsstefna RÚV

Umhverfis- og loftlagsstefna RÚV var lögð fram og samþykkt í febrúar 2022. Ríkisútvarpið ætlar að minnka losun gróðurhúsalofttegunda á hvert stöðugildi um sem nemur 30% fyrir árið 2030, miðað við losun ársins 2019. Það þýðir að árið 2030 má losun RÚV ekki fara yfir 200 tonn af koltvísýringsígildum.   Árið 2022 var losun vegna starfsemi RÚV samtals tæp 300 tonn af koltvísýringsígildum, hafði aukist um 42 tonn frá fyrra ári.

Umhverfis- og loftslagsnefnd skilaði aðgerðaáætlun vegna stefnu RÚV fyrir árin 2022-2026. Liður í þeirri áætlun var að uppfylla þrjú fyrstu grænu skref Umhverfisstofnunar. Auk þess tók RÚV upp loftslagsbókhald sem hugbúnaðarfyrirtækið Klappir heldur utan um. Fyrirtækið sérhæfir sig í stafrænni umhverfisstjórnun og bókhaldið gerir kleift að fylgjast með losun RÚV á nokkrum sviðum, því sem næst í rauntíma. Ríkisútvarpið leggur sitt af mörkum til kolefnisbindingar í gegnum mismunandi verkefni, en þó ríkir meðvitund um að slíkt framlag bætir ekki það tjón sem losun RÚV veldur og réttlætir ekki að slegið sé slöku við í að draga úr losun.

RÚVara lífið

Lífið á RÚV lifnaði aftur við eftir að samkomureglum var aflétt í upphafi árs 2022. Starfsmannasamtökin buðu upp á ýmsa viðburði á árinu; spurningakeppnir, haustgleði, aðventugleði og loks var hægt að halda jólaball aftur í stúdíó A og var það vel sótt fjölskylduskemmtun. Einnig var haldinn fjölskyldudagur í samstarfi við RÚV um vorið. Golfklúbbur RÚV var einnig virkur og þrjú vel sótt golfmót haldin um sumarið.

Þróun þekkingar

Lögð er áhersla að byggja upp hæfni og styrkja starfsfólk í fjölbreyttum hlutverkum innan RÚV. Starfsmannasamtöl eru notuð fyrir endurgjöf og sem vettvangur til að ræða starfsþróun. Starfsfólk allt styður við mikilvægt hlutverk almannaþjónustumiðils sem rýnir samfélagið, segir mikilvægar sögur og þróar nýjar leiðir til miðlunar.

Alls voru 50 fræðslu- og upplýsingafundir á árinu. Haldið var áfram með þróun rafræns fræðslukerfis þar sem starfsfólki gefst kostur á að sækja fræðsluefni þegar því hentar best og í boði eru fjölmörg stutt og hnitmiðuð námskeið. Kerfið er mikilvæg upplýsingaveita til starfsfólks um ýmis mannauðstengd mál og gegnir einnig þýðingarmiklu hlutverki í nýliðaþjálfun.

Lagt er kapp á að bjóða upp á sem flest fræðsluerindi á fjarfundum. Örfundir um málfar voru haldnir reglulega yfir árið og lögð var áhersla á fræðslu um fjölbreytileika og jafnrétti. Einnig voru sérhæfð námskeið í boði bæði fyrir stjórnendur og starfsfólk, til dæmis vel sótt námskeið um röddina sem atvinnutæki.

Náms- og kynnisferð var farin til Finnlands þar sem ríkissjónvarpið YLE var heimsótt og starfsfólk fékk tækifæri til að kynnast því starfi sem þar er unnið og mynda tengingar við finnska kollega. Þegar heim var komið var gerð ítarleg samantekt á því sem hæst bar í námsferðinni og getur nýst í starfi á RÚV.

Umbætur

Starfsánægja og líðan hefur verið greind árlega með nokkuð ítarlegri starfsumhverfiskönnun. Góður árangur hefur náðst í  mörgum þáttum og viðhorf starfsfólks til vinnustaðarins almennt jákvæð. Starfsánægja jókst á milli ára og sjálfstæði í starfi, skuldbinding, hollusta og stolt af vinnustaðnum eru sem fyrr helstu styrkleikar í viðhorfum starfsfólks.

Helstu umbótaþættir snúa að álagstengdum þáttum og samstarfi á milli sviða og eininga innan RÚV.