Auglýsing sem birtist nýlega á samfélagsmiðlum í Venesúela hefur vakið athygli. Í auglýsingunni er talað um kosti þess að sækja um hæli á Íslandi. Er með þessu verið að misnota hælisleitendakerfið eins og sumir halda fram? Rætt við Birgi Þórarinsson frá sjálfstæðisflokki og Þórhildi Sunnu Ævarsdóttur frá Pírötum.

Martin Ingi Sigurðsson svæfinga- og gjörgæslulæknir er í Rúanda á vegum bandarísku hjálparsamtakanna Team Heart, sem sinna hjartalækningum í samvinnu við heilbrigðisráðuneyti landsins. Við ræddum við Martin fyrir tæpu ári en þá sagði hann að eitt markmiðanna væri að kenna heimafólki að sinna þessum lækningum sjálft án utanaðkomandi aðstoðar. Kastljós kannaði hvernig það hefði gengið.

Draslskúffan, geymslan og úttroðin kompa eru vandamál sem eflaust eru sameiginleg með flestum íslenskum heimilum. Það er jafnframt sérstök sælutilfinning sem fylgir því að greiða úr óreiðunni í þessum rýmum, eins og Sigurlaug Elín Þórhallsdóttir veit vel - en hún býður skipulagsþjónustu fyrir heimili.