Guðmundir Ingi Kristinsson tilkynnti í gær að hann ætli að segja af sér sem mennta og barnamálaráðherra. Ragnar Þór Ingólfsson tekur við sem félags og húsnæðismálaráðherra og Inga Sæland formaður Flokks fólksins fer í mennta og barnamálaráðuneytið. Við heyrðum í Ólafi Þ. Harðarsyni stjórnmálafræðingi og prófessor emeritus.
Í upphafi Úkraínustríðsis var gerður samningur á milli ríkisins, Borgarbyggðar og Háskólans á Bifröst um að koma á móttökustöð fyrir flóttamenn sem vara átti í þrjá mánuði. Þetta skammtímaúrræði breyttist í langtímabúsetu og hefur þetta reynst sveitarfélaginu Borgarbyggð sem hafði ekkert með þessa ákvörðun að gera, afar dýrt. Stefán Broddi Guðjónsson sveitarstjóri kom til okkar.
Í Samfélaginu á Rás 1 í gær kom fram að niðurstaða er komin í mál sundlaugarinnar í Reykjahlíð í Þingeyjarsveit sem var fjarlægð af óljósum ástæðum fyrir næstum því áratug síðan í óþökk íbúa á svæðinu. Ekki stendur til að endurbyggja sundlaugina, að minnsta kosti ekki á þessu kjörtímabili og ástæðan ku vera hár kostnaður. Við heyrðum í söngvaranum Stefáni Jak, sem er öllum hnútum kunnugur á svæðinu.
Lokaatriði Stranger Things á Netflix, þar sem persónan Eleven, leikin af Milly Bobby Brown, kemur fyrir, var tekið upp á Íslandi. Í atriðinu sést Eleven í Þjórsárdal og má sjá fossana Háafoss og Granna. Ísland hefur í gegnum tíðina verið vinsæll tökustaður fyrir kvikmyndir og þáttaraðir en hvernig er staðan á því, nú þegar blikur eru á lofti í ferðaþjónustunni. Leifur Dagfinnsson hjá True North kíkti til okkar í Morgunútvarpið.
Við fjölluðum um leikskólamál hér í Morgunútvarpinu í gær og héldum því áfram í dag og heyrðum í Sonju Ýr Þorbergsdóttur formanni BSRB. Ný skýrsla aðgerðarhóps um brúun umönnunarbilsins leggur til aðgerðir sem gætu markað tímamót í fjölskyldu- og jafnréttismálum á Íslandi að mati Sonju Ýr verði þær að veruleika. Ein megintillagan er að rekstur leikskóla verði lögbundið hlutverk sveitarfélaga og að börn eigi rétt á leikskólavist að loknu fæðingarorlofi.
Vikan hefur verið viðburðarík og við ætlum venju samkvæmt fórum við yfir það helsta í fréttum vikunnar. Berghildur Erla Bernharðsdóttir fréttamaður á Sýn, Bylgunni og Vísi kom til okkar ásamt Grétari Theodórssyni almannatengli.
