Smástund hentar vel fyrir þau allra yngstu, í hverjum þætti lærum við orð, liti, tölur og tónlist. Dagskrárgerð: Agnes Wild. Tónlist: Sigrún Harðardóttir.

Vandaðir þættir þar sem hugur og skynjun barna eru örvuð á sjónrænan hátt án orða.

Fjólublái fíllinn Fílsi lærir ýmislegt um allskonar mismunandi vélar.

Danni tígur er þáttaröð sem kennir börnum að túlka tilfinningar sínar. Hvenær upplifa þau sorg, reiði og hvenær eru þau þakklát. Danni notar tónlist og syngur um það sem hann upplifir sem leyfir börnum að tileinka sér það frekar. Þátturinn er ætlaður leikskólabörnum og kennir tilfinningagreind og sjálfsvirðingu sem og virðingu fyrir öðrum.

Lærið um tölustafina með Tölukubbunum!

Teiknimyndaþættir fyrir börn byggðir á samnefndri breskri barnabók frá árinu 1994 eftir Sam McBratney, með myndskreytingum eftir Anitu Jeram. Bókin hefur verið gefin út á yfir 53 tungumálum og selst í yfir 28 milljónum eintaka.

Huggulegir þættir þar sem snjómaðurinn les úr sínum uppáhaldsbókum fyrir litlu mýsnar í bókabúðinni.

Vinirnir Begga og Fress leika sér að tölum og leysa saman ýmsar þrautir og gátur.

Hinrik hittir einhvern nýjan á hverjum degi og lendir í ótrúlegustu uppákomum.

Tillý býr í gulu húsi með fimm góðum vinum. Krókódíl, svíni, hænu, fíl og kanínu. Þau sýna og sanna að vináttan er það besta í heimi.

Víkingaprinsessan Guðrún býr úti í óbyggðum og á í sterku samband við náttúruna og dýrin.

Fyrsta þáttaröðin af hinni vinsælu Blæju. Blæja er sex ára hundur sem er stútfull af óstöðvandi gleði. Allir venjulegir hlutir geta orðið ævintýri hjá Blæju og fjölskyldu hennar.

Kærulausi unglingurinn Don Diego þjálfar sig í skylmingum þar sem hann ætlar sér að takast á við það mikla óréttlætti sem samlandar hans eru beittir af ógnarstjórninnisem þar ræður ríkjum. Hann verður framúrskarandi skylmingamaður og tekursér nafnið sem mjög margir þekkja, Zorro.

Teiknimyndaþættir um Ronju ræningjadóttur sem byggðir eru á þekktri sögu Astrid Lindgren. Ronja elst upp hjá ræningjum í skógum Skandinavíu. Líf hennar tekur stakkaskiptum þegar hún kynnist strák sem reynist vera sonur andstæðings föður hennar.

Uppátækjasömu vinirnir Bolli og Bjalla sem búa á skrifborði hins 12 ára gamla Bjarma snúa aftur með skemmtilegasta sjónvarpsþátt veraldar: Stundina okkar.

Einnig fáum við að fylgja við Bjarma í skólann og kynnast skemmtilegur skólafélögum hans. Hvort sem það er óhefðbundum íþróttatímum, heimshorna heimilisfræði, skemmtilegri hljómsveitaræfingu eða tilraunir á frítíma.

Leikarar: Níels Thibaud Girerd og Ásthildur Úa Sigurðardóttir

Leikstjóri: Agnes Wild

Framleiðandi: Erla Hrund Halldórsdóttir

Þetta er síðasti þáttur ársins og ráðgátan ógurlega um kökuna í krúsinni heldur áfram .

Bjarmi klárar heimaverkefnið sitt um skólahljómsveitina, þegar hann fræðist um Klarinett og krakkarnir í Heimilisfræði ferðast til Ástralíu og útbúa einn vinsælasta eftirrétt Ástrala, Lamington köku.

Í þáttunum Húllumhæ er menning og fjör í forgrunni. Við förum í leikhús, hlustum á tónlist, rýnum í bækur og sjáum hvað unga fólkið í landinu er að fást við. Þáttastjórnendur eru Anja Sæberg og Bjarni Kristbjörnsson

Í Húllumhæ: Við kíkjum í Norræna húsið á sýningu um Einar Áskel sem varð fimmtugur í fyrra, kynnumst Halaleikhópnum og keppendum á seinna undanúrslitakvöldi Söngvakeppninnar.

Umsjón:

Bjarni Kristbjörnsson

Fram komu:

Hrafnhildur Gissurardóttir

Hanna Margrét Kristleifsdóttir

Sigrún Valbergsdóttir

Ása Hildur Guðjónsdóttir

Silja Rós Ragnarsdóttir

Kjalar Martinsson Kollmar

Úlfar Viktor Björnsson

Kristín Sesselja Einarsdóttir

Sigríður Ósk Hrafnkelsdóttir

Axel Hallkell Jóhannesson

Erik Quick

Jón Þorleifur Steinþórsson

Handrit og dagsrárgerð:

Karitas M. Bjarkadóttir

Þáttaröð frá 2014 úr smiðju Ævars vísindamanns fyrir krakka á öllum aldri, stútfull af æsispennandi tilraunum og fróðleik.

Bein útsending frá spurningakeppni framhaldsskólanna. Spurningahöfundar og dómarar eru Laufey Haraldsdóttir, Jóhann Alfreð Kristinsson og Helga Margrét Höskuldsdóttir. Spyrill er Kristjana Arnarsdóttir. Sjórn útsendingar: Sturla Holm Skúlason.

Í þessum þætti mætast lið Fjölbrautaskóla Suðurlands og Flensborgarskólans í Hafnarfirði.

Gísli Marteinn tekur á móti góðum gestum á föstudagskvöldum í vetur og fer með þeim yfir helstu atburði vikunnar í stjórnmálum, menningu og mannlífi. Persónur og leikendur koma í spjall og brakandi fersk tónlistaratriði koma landsmönnum í helgarstemninguna. Stjórn útsendingar: Ragnar Eyþórsson.

Í sófanum að þessu sinni eru þau Víðir Reynisson, Guðjón Davíð Karlsson og Kristín Ólafsdóttir.

Berglind Festival fer á stúfana og skoðar strákasveitir.

Kári Egilsson flytur lagið Something Better.

Lifandi og fjölbreyttur þáttur um fréttir, menningu og dægurmál. Helstu fréttir dagsins eru krufðar og ljósi varpað á litríkt mannlíf um land allt. Umsjón: Baldvin Þór Bergsson, Bergsteinn Sigurðsson, Guðrún Sóley Gestsdóttir, Óðinn Svan Óðinsson, Sigríður Dögg Auðunsdóttir og Viktoría Hermannsdóttir.

Tónlistarkonan Una Torfa hefur verið á miklu flugi að undanförnu. Hún sló í gegn með laginu Fyrrverandi og fyrsta plata hennar, Flækt, týnd og einmana, var ein af plötum ársins á árinu sem leið. Una hamrar járnið á meðan það er heitt og er strax byrjuð á næstu plötu. Kastljós dró upp nærmynd af söngkonunni.

Um fátt annað er rætt þessa dagana en verkföll og áhrif þeirra á daglegt líf. En það er ekkert nýtt að verkföll setji samfélagið úr skorðum. Við ræðum við Sumarliða Ísleifsson sagnfræðing og rifjum upp nokkrar sögulegar verkfallsaðgerðir.

Víkingur Heiðar Ólafsson og Halla Oddný Magnúsdóttir leiða áhorfendur í tali og tónum um töfraheima sígildrar tónlistar. Þau spjalla á léttu nótunum um tónlist frá ýmsum tímum auk þess sem Víkingur leikur verk af nýlegum hljómplötum sínum á sviði Eldborgar í Hörpu.

Beinar útsendingar frá HM í skíðagöngu.

Bein útsending frá keppni í skiptigöngu kvenna á HM í skíðagöngu.

Íslensk heimildarmynd þar sem fjórar af ástsælustu leikkonum þjóðarinnar, þær Edda Björgvinsdóttir, Kristbjörg Kjeld, Margrét Ákadóttir og Margrét Guðmundsdóttir ræða lífið í samhengi við leikverkið Ein komst undan eftir Caryl Churchill sem þær setja upp í Borgarleikhúsinu undir leikstjórn Kristínar Jóhannesdóttur. Framleiðandi: Republik.

Þáttur sem er löngu orðinn ómissandi í bókmenntaumræðunni í landinu. Egill og bókelskir félagar hans fjalla sem fyrr um forvitnilegar bækur af ýmsum toga og úr öllum áttum. Umsjón: Egill Helgason. Dagskrárgerð: Jón Víðir Hauksson.

Við fjöllum um franska stórrithöfundinn Honoré de Balzac í Kilju vikunnar. Balzac skrifaði ótal bækur, drakk mikið kaffi og átti stormasama ævi, en bækur hans eru magnaðar samtímalýsingar og sjónarspil. Öldungurinn Sigurjón Björnsson hefur undanfarin ár þýtt margar helstu sögur Balzacs og er enn að - 96 ára gamall. Við heimsækjum Sigurjón. Stella Soffía Jóhannesdóttir, framkvæmdastjóri Bókmenntahátíðar í Reykjavík, segir okkur frá gestum hátíðarinnar sem haldin verður í apríl. Í Bókum og stöðum förum við norður á Vatnsnes og í Hörgárdal á slóðir skáldkonunnar Ólafar Sigurðardóttur frá Hlöðum. Þær Sunna Dís Másdóttir og Kolbrún Bergþórsdóttir bregða sér á bókamarkað Félags íslenskra bókaútgefenda og velja sér bækur til lestrar - og hið sama gerir umsjónarmaður þáttarins.

Íslensk þáttaröð í átta hlutum um líf fólks sem býr við skerta starfsgetu og/eða líkamlega fötlun af ýmsum toga. Í þáttunum fylgjumst við með fólki á öllum aldri, víða um land, í ýmsum störfum og með ólíka fötlun og fjölskyldugerð. Dagskrárgerð: Elín Sveinsdóttir. Framleiðsla: SERES hugverkasmiðja.

Í þessum þætti segir Brandur Bryndísarson Karlsson sögu sína. Þrátt fyrir að hafa misst máttinn í líkamanum á þrítugsaldri upplifir hann nú drauma sína að fullu.

Heimildarmynd í tveimur hlutum um hóp Íslendinga sem kynnir íslenska torfærukeppni fyrir Bandaríkjamönnum, en 15 bílstjórar halda utan ásamt dyggum hópi aðstoðarmanna. Leikstjórn: Andri Freyr Viðarsson. Framleiðsla: RÚV og Republik Films.

Valin myndskeið úr Landanum þar sem áhugaverðir staðir eru skoðaðir og merkilegir Íslendingar heimsóttir. Dagskrárgerð: Gísli Einarsson og Karl Sigtryggsson.

Frásögn Ragnhildar Guðmundsdóttur, ritsímaritara sem var á vakt í Loftskeytastöðinni á Ísafirði 4. febrúar 1968 þegar ofsaveður gekk yfir landið og stóð í tvo daga. Fjölmörg skip voru á sjó og eftir því sem leið á daginn og nóttina varð veðrið sífellt verra. Á þriðja tug togara slógust við ísingu í eins stigs frosti og fárviðri. 26 skipverjar af þremur bátum létust í óveðrinu sem teygði sig yfir tvo daga.

Helstu fréttir dagsins af innlendum og erlendum vettvangi. Alla daga, árið um kring.

Fótboltabaráttan heldur áfram og keppast Jamie og félagar um að gera liðið sitt sem sterkast. En með nýjum aðstoðarþjálfara og nýjum liðsmönnum koma ný átök. Bæði á vellinum og utan hans.

Bolli og Bjalla bralla ýmislegt við gerð á þættinum Stundinni okkar.

Bolli og Bjalla snúa aftur eftir sumarfrí og er förinni heitið beinustu leið í skólann hans Bjarma. Babb kemur í bátinn þegar Bjalla neyðist til að verða eftir ein heima, sökum veikinda og ókunnugir álfar mæta á skrifborðið til að "taka allt niður".

Stuttir sænskir heimildarþættir um bækur sem hafa haft mikil áhrif á almenning í Svíþjóð.

Lottó-útdráttur vikunnar.

Helstu fréttir dagsins af innlendum og erlendum vettvangi. Alla daga, árið um kring.

Íþróttafréttir.

Veðurfréttir.

Beinar útsendingar frá Söngvakeppninni 2023 í Söngvakeppnishöllinni í Gufunesi. Stjórn útsendingar: Salóme Þorkelsdóttir og Þór Freysson.

Bein útsending frá seinni undankeppni Söngvakeppninnar í Söngvakeppnishöllinni í Gufunesi. Í kvöld verða flutt seinni fimm lögin af tíu sem keppa til úrslita.

Grínsketsaþættir þar sem samskipti, íslensk menning, samfélagsmiðlar og allt sem er mannlegt er skoðað í kómísku ljósi. Handrit, aðalhlutverk og leikstjórn er í höndum Kanarí-hópsins, sem samanstendur af nýrri kynslóð grínista sem hafa gert það gott með leiksýningu og sjónvarpssketsum síðustu misseri.

Rómantísk gamanmynd frá 2018, byggð á samnefndri metsölubók eftir Nick Hornby. Annie er föst í dauflegu sambandi með Duncan sem hefur mestan áhuga á að leita uppi löngu gleymdan rokkara að nafni Tucker Crowe. Sambandið verður skyndilega áhugavert þegar Annie hittir rokkhundinn Crowe fyrir tilviljun og neistinn blossar upp á milli þeirra. Leikstjóri: Jesse Peretz. Aðalhlutverk: Rose Byrne, Ethan Hawke og Chris O' Dowd.

Frönsk gamanmynd frá 2018 um hóp miðaldra karlmanna sem ákveða að stofna lið aðeins skipað körlum og hefja æfingar í samhæfðri sundfimi í hverfislauginni. Leikstjóri: Gilles Lellouche. Aðalhlutverk: Mathieu Amalric, Guillaume Canet og Benoît Poelvoorde. Myndin er ekki við hæfi barna yngri en 12 ára.