RÚV okkar allra
Hér upplýsum við um starfsemina, bjóðum upp á samtal og svörum spurningum þínum

Yfirlýsing RÚV vegna birtingar Samherja á myndbandi um fréttaumfjöllun RÚV og forsíðugrein Fréttablaðsins  

Mynd með færslu
 Mynd: Ragnar Visage - RÚV
Í Fréttablaðinu í dag er fréttamaður RÚV, Helgi Seljan, borinn þungum sökum. Tilefni fréttarinnar er myndband sem sjávarútvegsfyrirtækið Samherji hefur látið útbúa fyrir sig og birt var á Youtube-rás Samherja í dag. 

Þar eru fréttamaðurinn og RÚV sökuð um að hafa falsað gögn við gerð Kastljósþáttar árið 2012 og því haldið fram að skýrsla Verðlagsstofu sem umfjöllunin byggðist meðal annars á, hafi aldrei verið til. RÚV hafnar þessu sem röngu. 
 
Það er líklega einsdæmi að stórfyrirtæki leggi í persónulega herferð gegn blaðamanni með áratugareynslu. Þessi grófa árás þjónar þeim eina tilgangi að skaða mannorð fréttamanns RÚV, sem hefur hvorki falsað gögn né „átt við þau“ og trúverðugleika fréttastofunnar. 
 
Kerfisbundin atlaga gegn fréttamiðlum til að verjast gagnrýninni umfjöllun er ekki ný af nálinni en sú aðferð sem Samherji beitir nú gengur mun lengra en þekkst hefur hér á landi. Það er umhugsunarvert. 
 
Helgi Seljan er einn öflugasti rannsóknarblaðamaður landsins og hefur kallað yfir sig reiði hagsmunaaðila með vinnu sinni, og nú herferð stórfyrirtækis gegn mannorði hans og æru. RÚV fordæmir þessa  aðför sem gerð er að fréttamanninum með tilhæfulausum ásökunum.  
 
Stefán Eiríksson útvarpsstjóri og Rakel Þorbergsdóttir fréttastjóri RÚV

11.08.2020 kl.13:08
Samskiptasvið RÚV
Birt undir: Í umræðunni, Í umræðunni