Lokað hefur verið fyrir innsendingar hugmynda að vori 2021.
Úrvinnsla innsendra hugmynda er í fullum gangi og verður samband haft við hugmyndasmiði eins fljótt og auðið er.

------------------------------

Langar þig til að segja góða sögu í hljóðvarpi og hlaðvarpi? 
Ertu með hugmynd að þáttagerð fyrir ungt fólk, í sjónvarp eða á vef?

Hugmyndadagar RÚV verða haldnir í sjöunda sinn 27.-28. apríl 2021.

Hugmyndasmiðum, höfundum, framleiðendum og öðrum gefst kostur á að kynna hugmyndir og tillögur að dagskrárefni fyrir dagskrárstjórum RÚV. Hugmyndadagar fara alla jafna fram tvisvar á ári og voru fyrst haldnir í október 2017.

Alls hafa yfir 1300 hugmyndir borist Hugmyndadögum frá upphafi, um 400 hópar og einstaklingar verið boðaðir á fund í Efstaleiti til að kynna tillögur sínar nánar og á sjötta tug verkefna hafa þegar orðið að veruleika, eru í þróun eða í frekari skoðun. Markmiðið er að auka enn fjölbreytni í dagskrárframboði RÚV, opna hugmyndaþróunina og styrkja tengsl RÚV og sjálfstæðra framleiðenda. Meðal hugmynda sem komið hafa inn á Hugmyndadögum og orðið að veruleika eru dagskrárliðirnir Árny og Daði í Kambódíu, Hinseginleikinn, Smá pláss, Fólkið á bak við flóttann, Ólétta stelpan, Ymur, Ekkert skiptir máli, Íslenska mannflóran, Hyldýpi og Fallnar borgir, Lífsformið, Lögfræði á mannamáli, Nærumst og njótum, Sælla að gefa o.fl.

Í þetta sinn kallar Rás 1 eftir hugmyndum að frásagnardrifnum heimildaþáttaröðum og framhaldsleikritum, þar sem byggt er á sögum af atburðum og fólki.  Til viðmiðunar er bent á eldri þáttaraðir Rásar 1 á borð við Hyldýpi, Flóð, Á ég bróður á Íslandi? og SOL. Rás 2 kallar einnig eftir heimildaþáttaröðum hverskonar og RÚV sjónvarp kallar eftir sjónvarps- og vefefni um og fyrir ungt fólk.

Frestur til að koma hugmyndum og tillögum á framfæri er til og með 19. mars. Unnið verður úr innsendum hugmyndum og völdum hópi boðið að kynna hugmyndir sínar fyrir dagskrárstjórum á Hugmyndadögum 27.-28. apríl 2021. Framleiðslufyrirkomulag og annað er opið til frekari umræðu en í dag framleiðir RÚV hluta af efni sínu sjálft en vinnur annað í samstarfi.

Netfang Hugmyndadaga er [email protected].

Stefnt er að því að halda Hugmyndadaga aftur haustið 2021.