Athugið þessi frétt er meira en 2 ára gömul.

Yfirlögregluþjónn keypti vændi

16.01.2019 - 17:11
Mynd með færslu
Mynd úr safni Mynd: KSÍ
Fyrrverandi yfirlögregluþjónn hjá lögreglunni á Vesturlandi greiddi í nóvember á síðasta ári sekt upp á 100 þúsund krónur vegna vændiskaupa. Ríkissaksóknari upplýsti lögreglustjórann á Vesturlandi í byrjun júní um að þáverandi yfirlögregluþjónn væri til rannsóknar vegna ætlaðs brots gegn almennum hegningarlögum Hann lét af störfum mánuði síðar.

Maðurinn var á mánudag dæmdur til að greiða aðra 100 þúsund króna sekt fyrir slagsmál sín og annars lögreglumanns í Vestmannaeyjum. Í þeim dómi kemur fram að hann hafi í nóvember gengist undir sektargreiðslu upp á 100 þúsund krónur vegna brots gegn kynferðisbrotakafla almennra hegningarlaga. 

Fréttastofa óskaði eftir upplýsingum frá ríkissaksóknara um hvort og þá hvenær lögreglustjórinn á Vesturlandi hefði verið upplýstur um að yfirmaður hjá honum væri grunaður um brot gegn hegningarlögum.

Sigríður Friðjónsdóttir ríkissaksóknari segir í svari sínu til fréttastofu að lögreglustjórinn hafi verið upplýstur um það í byrjun júní að yfirmaðurinn sætti rannsókn vegna ætlaðs brots gegn 1. málsgrein 206. grein hegningarlaga. Þar er kveðið á um að sá sem greiðir eða heitir greiðslu eða annars konar endurgjaldi fyrir vændi skuli sæta sektum eða fangelsi allt að einu ári. Sigríður segir að lögreglustjórinn hafi verið upplýstur um þetta með hliðsjón af ákvæðum lögreglulaga og ákvæðum laga um réttindi og skyldur starfsmanna.

Úlfar Lúðvíksson, lögreglustjórinn á Vesturlandi, segir í skriflegu svari við fyrirspurn fréttastofu að viðkomandi yfirmaður hafi beðist lausnar þann 1. júlí síðastliðnum sem hann hafi fallist á samdægurs. Maðurinn hafi lokið störfum sama dag en starfslok hans fóru ekki hátt á sínum tíma. „Á þeim tíma er yfirlögregluþjónn baðst lausnar hafði undirritaður upplýsingar um rannsókn á hendur honum sem beindist að broti gegn framangreindum kafla almennra hegningarlaga.“

Fréttinni hefur verið breytt.

freyrgigja's picture
Freyr Gígja Gunnarsson
Fréttastofa RÚV