- Neðar í fréttinni birtust nýjustu fréttir jafnóðum og hægt að sjá yfir 120 færslur sem birtust frá miðnætti.
Flóðið í Súgandafirði var svo kröftugt að flóðbylgja fylgdi í kjölfarið. Varðskipið Þór flytur bjargir frá Ísafirði til Flateyrar. Fjöldahjálparstöðvar hafa verið settar upp fyrir íbúa svæða sem hafa verið rýmd vegna snjóflóðahættu.
Samhæfingarmiðstöðin í Skógarhlíð var virkjuð og aðgerðarstjórn fyrir vestan kom saman.
Unglingsstúlkan, sem björgunarsveitarmenn björguðu úr snjóflóði á Flateyri í kvöld, var föst í snjóflóðinu í rúman hálftíma. Systkini hennar, 5 ára stúlka og 9 ára drengur, komust út úr húsinu ásamt móður sinni með því að klifra út um glugga.
Samkvæmt upplýsingum fréttastofu fór snjóflóðið í gegnum húsið og út að stofuglugga sem vísar niður í bæ. Einhver snjór fór inn í herbergi drengsins og telpunnar en þau komust bæði til móður sinnar sem var inni í stofu.
Hitt snjóflóðið á Flateyri eyðilagði alla báta í höfninni nema einn. Gísli Jón Kristjánsson, eigandi Öldu ÍS, sem var eina skipið sem bjargaðist í höfninni í Flateyri, segir í samtali við fréttastofu að það sé greinilegt að krafturinn í flóðinu hafi verið mikill. „Þetta er allur flotinn sem er þarna farinn og flotbryggjan líka. Þetta hefur verið gríðarlegt högg, það er mikill snjór í höfninni. Þetta er algjör hörmung.“
Flóðbylgjan af völdum snjóflóðsins í Súgandafirði olli ekki miklu tjóni. Sjór flæddi inn í eitt hús og aðeins upp á veg.
Fréttin var uppfærð 15. janúar klukkan 20.
