Athugið þessi frétt er meira en 2 ára gömul.

Vinsælustu leitarorð Íslendinga á árinu

18.12.2019 - 19:26
google · Netið
Mynd: Grafík/RÚV / Grafík/RÚV
Meðal vinsælustu leitarorða Íslendinga á Google á árinu voru lúsmý, Hatari og Notre Dame. Gunnar Nelson er sá Íslendingur sem flestir flettu upp á netinu.

Á lista yfir orð og nöfn sem landsmenn leituðu mest að á Google á árinu kennir ýmissa grasa. Þetta eru þó ekki þau leitarorð sem mest voru slegin inn, heldur þau vinsælustu, þau sem hafa aukist mest í vinsældum frá árinu áður. 

„Þegar við athugum í lok árs að hverju mest hefur verið leitað þá eru það alltaf orð eins og Facebook, Google og YouTube. En þegar við tökum saman helstu leitir ársins þá skoðum við hvar vöxturinn hefur verið mestur því það segir helst til um hvernig árið hefur verið,“ segir Jesper Vangkilde, samskiptastjóri hjá Google í Danmörku.

Hér má sjá listann yfir vinsælustu leitarorðin hér á landi á árinu, en nánari umfjöllun um listann má sjá í spilaranum hér að ofan;

  1. Ed Sheeran
  2. Hatari
  3. Game of Thrones
  4. Cameron Boyce
  5. Notre Dame
  6. Chernobyl
  7. Lúsmý
  8. Madonna
  9. Mislingar
  10. Luke Perry

„Við sjáum greinilega að dægurmenning hefur verið mjög fyrirferðarmikil. Það sést strax í tengslum við tónleikana sem Ed Sheeran hélt  að Íslendingar gúggluðu hann í gríð og erg,“ segir Vankilde.

Mynd með færslu
 Mynd: RÚV/Bragi Valdimarsson
Jesper Vangkilde, samskiptastjóri hjá Google í Danmörku.

Gunnar Nelson aftur á topp tíu

Sá Íslendingur sem flestir flettu upp á Google á árinu er bardagakappinn Gunnar Nelson. Hann var í þriðja sæti á sams konar lista í fyrra, og er sá eini sem á sæti á topp tíu listanum tvö ár í röð. Í fyrra var knattspyrnumaðurinn Rúrik Gíslason í fyrsta sæti. 

Hér má sjá lista yfir nöfn þeirra Íslendinga sem flestir flettu upp á Google á árinu:

  1. Gunnar Nelson
  2. Ægir Ib-Wessman
  3. Halli Reynis
  4. Eva Laufey
  5. Nanna Kristín Magnúsdóttir
  6. Gísli Þór Þórarinsson
  7. Friðrik Ómar
  8. Þorsteinn Már Baldvinsson
  9. Gunnar Jóhann Gunnarsson
  10. Hera Björk

Hér má sjá samantekt á samskonar listum Google, bæði á heimsvísu og einnig eftir löndum. 

 

Birta Björnsdóttir
Fréttastofa RÚV