Athugið þessi frétt er meira en mánaðargömul.

Vilja Þingeyinga úr nýjum landshlutasamtökum

07.02.2020 - 17:37
Mynd með færslu
 Mynd: RÚV - Björgvin Kolbeinsson
Framsýn stéttarfélag í Þingeyjarsýslum og Sam­tök at­vinnu­rek­enda á Norðausturlandi, gagnrýa stofnun nýrra landshlutasamtaka í fjórðungnum. Skorað er á sveitarfélögin í  Þingeyjarsýslum að ganga tafarlaust úr þessu nýja félagi.

Í lok síðasta árs voru Samtök sveitarfélaga og atvinnuþróunar á Norðurlandi eystra (SSNE) stofnuð, við sameiningu Eyþings, Atvinnuþróunarfélags Þingeyinga, og Atvinnuþróunarfélags Eyjafjarðar.

Heyrðu af samrunanum í fjölmiðlum

Nú hafa Samtök atvinnurekenda á Norðausturlandi (SANA) og Framsýn stéttarfélag sent frá sé tilkynningu þar sem þessi sameining er dregin í efa. Ákvörðun um þetta hafi verið tekin af meirihluta í þeim sveitarstjórnum í Eyjafirði og Þingeyjarsýslum sem mynda kjölfestuna í hinu nýja félagi. „Hvorki almennir íbúar eða  fyrirtæki höfðu sérstakt vægi við þessa ákvörðun og heyrðu einungis af henni í fjölmiðlum. Þannig voru ekki haldnir kynningarfundir fyrir íbúa eða fyrirtæki í aðdraganda þessarar ákvörðunar,“ segir í tilkynningunni.

Óljós stuðningurinn við atvinnulíf í Þingeyjarsýslum

SANA og Framsýn hafi lengi átt sinn fulltrúann hvort í stjórn Atvinnuþróunarfélags Þingeyinga og þeir hafi báðir verið gagnrýnir á þann samruna sem hér um ræðir og þótt óljóst hver hagræðið ætti að vera fyrir
stuðning við atvinnulíf í Þingeyjarsýslum.  Auk þess hafi þeir óttast að völd og ákvarðanataka hins nýja félags yrði á Akureyri vegna ójafns íbúafjölda. 

Öll völdin á Eyjafjarðarsvæðinu

Nú hafi komið í ljós það sem fulltrúar SANA og Framsýnar óttuðust: „Í samþykktum hins nýja félags SSNE stendur skýrum stöfum að stjórnarformaður nýja félagsins skuli um ókomna tíð koma frá Akureyri hvað sem tautar og raular.  Nýráðinn framkvæmdastjóri SSNE er svo auk þess einnig búsettur á Akureyri. Meirihluti stjórnar verður frá Eyjafjarðarsvæðinu í krafti íbúafjölda. Í samþykktunum kemur þó fram að varnarþing skuli vera á Húsavík en það hefur augljóslega lítið vægi miðað við hin atriðin.“

Betur heima setið en af stað farið

Að lokum skora stjórnir SANA og Framsýnar á sveitarfélögin í  Þingeyjarsýslum að ganga tafarlaust úr nýstofnuðu félagi. „Enda liggur fyrir að völd og ákvarðanataka verður öll utan Þingeyjarsýslna og því mun betur heima setið fyrir Atvinnuþróunarfélag Þingeyinga en af stað farið,“ segir í tilkynningu þeirra.