Athugið þessi frétt er meira en 2 ára gömul.

Vildi ekki segja hvort Haraldur nyti trausts

Mynd með færslu
 Mynd: Samsett mynd - RÚV
Áslaug Arna Sigurbjörnsdóttir, dómsmálaráðherra, vildi ekki tjá sig hvort Haraldur Johannessen, ríkislögreglustjóri, njóti trausts. „Það er auðvitað bara verið að skoða öll þessi mál í heild sinni í ráðuneytinu og það er mjög mikilvægt líka að embættið nýtur trausts. Þar er verið að vinna góða vinnu og mikið af góðu fólki sem er að sinna því,“ sagði Áslaug eftir fund sinn með stjórnskipunar-og eftirlitsnefnd í morgun.

Athygli vakti að þegar Áslaug Arna kom á fund nefndarinnar yfirgaf Brynjar Níelsson, flokksbróðir hennar, fundinn.  Fréttastofa hefur ekki náð tali af Brynjari. Í viðtali við visir.is sagðist þingmaðurinn ekki hafa viljað taka þátt í „einhverju pólitísku sjónarspili einstakra nefndarformanna eða alþingismanna.“ Mál ríkislögreglustjóra væri á borði dómsmálaráðherra og ætti heima þar.

Áslaug sagði í kvöldfréttum RÚV í gærkvöld að embættismenn nytu ríkrar réttarverndar. „„Þegar starfsmenn bregðast skyldum er hægt að setja ákveðna atburðarás á stað og sú vinna er í gangi.“ Ráðherrann dró aðeins úr þessum orðum sínum eftir nefndarfundinn í morgun og sagðist hafa verið að vísa til þess að verið væri að skoða allt hans mál og mál lögreglunnar í heild sinni í ráðuneytinu. 

Sigríður Björk Guðjónsdóttir, lögreglustjóri á höfuðborgarsvæðinu, vildi ekki tjá sig um hugmyndir ráðherrans um að sameina embætti lögregustjórans á höfuðborgarsvæðinu og ríkislögreglustjóra.  Það væri ráðherra sem væri með þessi skipulagsmál. Fréttastofa fékk jafnframt þau skilaboð frá almannatenglaskrifstofunni KOM í gærkvöld að Haraldur Johannessen myndi ekki veita viðtal. 

Gustað hefur um Harald eftir viðtal við hann í Morgunblaðinu og svo virðist sem þverpólitísk samstaða sé um að hann verði að víkja. Páll Magnússon, formaður allsherjarnefndar, sagði í Morgunútvarpi Rásar 2 í morgun að Haraldur gæti ekki setið áfram. „Það er algjörlega óboðlegt að ríkislögreglustjóri segi þá hluti sem hann sagði í viðtalinu - að hann skuli gefa það til kynna að hann sitji inni með einhverja vitneskju um spillingu í lögreglunni sem hann ætli ekki að opinbera nema eitthvað annað gerist.“

Helga Vala Helgadóttir, þingmaður Samfylkingarinnar, tók í sama streng. „Það segir sig sjálft að einhver þarf að stíga til hliðar, annað hvort hann eða allir lögreglustjórar og lögreglumenn á Íslandi. Mér finnst þetta reiknidæmi frekar einfalt ef ég á að segja eins og er.“ Áður hafa 8 af 9 lögreglustjórum landsins lýst yfir vantrausti á ríkislögreglustjóra sem og Landssamband lögreglumanna.