Athugið þessi frétt er meira en mánaðargömul.

Verja 6,7 milljörðum í íþróttamannvirki á Akureyri

11.11.2019 - 14:29
Mynd með færslu
 Mynd: Eva Björk Benediktsdóttir - RÚV
Starfshópur um nýframkvæmdir íþróttamannvirkja Akureyrarbæjar lagði í síðustu viku fram tllögur að forgangsröðun í uppbyggingu næstu 15 árin. Heildarkostnaður verkefnanna eru metinn á rúmlega 6,7 milljarða en til samanburðar voru útsvarstekjur Akureyrarbæjar árið 2017 rúmlega 9,1 milljarður. Tillögurnar eru birtar í skýrslu þar sem 11 verkefnum er forgangsraðað eftir mikilvægi.

Starfshópur á vegum frístundaráðs tók til starfa í mars. Hlutverk hans var að greina gróflega stofn- og rekstrarkostnað við helstu íþróttamannvirki til framtíðar, stilla upp röð uppbyggingar og samspili verkefna og meta mögulegan framkvæmdahraða út frá fjárhagslegu svigrúmi bæjarins og fjárþörf verkefna.

Fyrsta verk hópsins var að kalla eftir upplýsingum frá aðildarfélögum ÍBA, eins konar óskalista um hvaða aðstöðu hvert félag þyrfti á næstu 5-15 árum. Skýrslan var svo í síðustu viku til umfjöllunar í frístundaráði Akueyrarbæjar sem vísaði henni til bæjarráðs. Skýrslan verður kynnt á fundi með íþróttahreyfingunni í dag. 

Tillögur hópsins er um eftirfarandi röð framkvæmda:

  1. Uppbygging á félagssvæði Nökkva við Höpnersbryggju
    Kostnaður um 150 m.kr
    Byggja félagsaðstöðu og bátageymslu
  2. Félags- og æfingaaðstaða í Skautahöll Akureyrar
    Kostnaður um 150 m.kr
    Reisa félags- og æfingaaðstöðu í norðurenda Skautahallar.
  3. KA gervigras og stúka
    Kostnaður um 1.000 m.kr
    Útbúa æfinga- og keppnisaðstöðu á gervigrasi á félagssvæði KA ásamt stúkubyggingu.
  4. KA félagsaðstaða
    Kostnaður um 500 m.kr
    Útbúa félagsaðstöðu fyrir daglega starfsemi félagsins, æfingaaðstaða fyrir deildir innan félagsins, búningsklefar fyrir starfsemina.
  5. Hlíðarfjall þjónustuhús
    Kostnaður um 450 m.kr
    Reisa þjónustuhús fyrir starfsemi Skíðastaða í Hlíðarfjalli sem mun m.a. innihalda veitingaaðstöðu og salerni, miðasölu fyrir gesti, aðstöðu fyrir skíðaskóla, aðstöðu fyrir skíðaleigu, aðstöðu fyrir Skíðafélag Akureyrar, aðstöðu fyrir starfsfólk.
  6. Golf- vetraraðstaða
    Kostnaður um 100 m.kr
    Reisa innanhússæfingaaðstöðu við golfskálann að Jaðri.
  7. Innisundlaug
    Kostnaður 1.500 m.kr
    Byggja 50 metra innanhússundlaug fyrir kennslu, æfingar og keppni.
  8. Þór - vestan við Bogann
    Kostnaður 600. m.kr
    Byggja félags-, æfinga- og geymsluaðstöðu við vesturhlið Bogans. Aðstaða fyrir deildir félagsins til æfinga, félags- og skrifstofuaðstaða deilda, salerni og geymsla fyrir starfsemi í Boganum.
  9. Þór íþróttahús
    Kostnaður 1.000 m.kr
    Byggja íþróttahús á félagssvæði Þórs fyrir innanhússíþróttagreinar.
  10. Þór - gervigras á æfingasvæði
    Kostnaður 300 m.kr
    Útbúa utanhúss gervigrasæfingasvæði á félagssvæði Þórs.
  11. KA íþróttahús
    Kostnaður 1.000 m.kr
    Byggja íþróttahús á félagssvæði KA fyrir innanhúsgreinar.

Skýrsluna má lesa í heild sinni hér.