Athugið þessi frétt er meira en 1 ára gömul.

Varðskipið Þór komið til hafnar á Dalvík

12.12.2019 - 13:51
Mynd: Landhelgisgæslan / Landhelgisgæslan
Þór, varðskip Landhelgisgæslunnar, er kominn til hafnar á Dalvík. Vonir standa til að skipið geti nýst sem varaaflstöð fyrir bæinn, sem hefur verið rafmagnslaus í á annan sólarhring. Dalvíkurlína brast í fárviðrinu, sem sér Dalvík, Siglufirði og Ólafsfirði fyrir rafmagni.

Þór lagði af stað frá Siglufirði til Dalvíkur klukkan níu í morgun. Fram kemur í tilkynningu frá Landhelgisgæslunni að þetta sé í fyrsta sinn sem varðskipið Þór er nýtt sem hreyfanleg aflstöð. Þór getur flutt tvö megavött af rafmagni í land en það er nóg til þess að halda meðalstóru sveitarfélagi gangandi í neyðartilvikum.

„Við hönnun skipsins var horft til þess að mögulegt yrði að senda rafmagn í land á afskekktum stöðum vegna rafmagnsleysis. Til þessa hafa rafmagnsdreifingaraðilar og veitufyrirtæki ekki talið unnt að tengjast skipinu fyrr en nú. Sérfræðingur skipatæknisviðs Landhelgisgæslunnar er á leið til Dalvíkur þar sem hann aðstoðar við tenginguna,” segir Landhelgisgæslan í tilkynningunni. „Áhöfnin á varðskipinu Þór hefur staðið í ströngu í vikunni. Í nótt flutti skipið færanlega aflstöð frá Ísafirði til Siglufjarðar. Óskað var eftir því að einn varðskipsmanna yrði eftir á Siglufirði til að aðstoða við löggæslu.”