Varað við svifryksmengun á Akureyri

04.11.2019 - 12:27
Mynd með færslu
 Mynd: Akureyrarbær - RÚV
Varað er við mjög miklu svifryki á Akureyri í dag. Börn og fólk með viðkvæm öndunarfæri ættu að forðast útivist við umferðargötur. Kalt er í veðri, hægur vindur og götur þurrar og því má búast við að svifryksmengun fari yfir heilsuverndarmörk áfram næstu daga.

Klukkan 11 í dag sýndu mælingar á loftgæðum við Strandgötu á Akureyri 139,0 µg/m³, fari mælingar yfir 100 µg/m³ telst það slæmt og einstaklingum með ofnæmi eða alvarlega hjarta- eða lungnasjúkdóma ráðlagt að forðast staði þar sem hætta er á mikilli mengun. 

Þegar styrkurinn er kominn yfir 150 µg/m³ geta þeir einstaklingar sem ekki eiga við vandamál í öndunarfærum að stríða fundið fyrir óþægindum. 

Samkvæmt vef Umhverfisstofnunar mælast loftgæði góð annars staðar á landinu. 

 

Úlla Árdal
Fréttastofa RÚV
Síðast:
Þessi þáttur er í hlaðvarpi