Laun fyrir dómgæslu í íslenskri knattspyrnu eru ákveðin eftir erfiðleikastigi. Í þeirri flokkun er efsta deild karla í efsta flokki en kvenna í þeim þriðja - flokki neðar en B-deild karla. Dómarar fengu á síðasta ári 37.600 krónur fyrir dómgæslu í leik í efstu deild karla en 16 þúsund krónur fyrir leiki í efstu deild kvenna, sem er um 135 prósenta munur. Mist Edvardsdóttir leikmaður Íslandsmeistara Vals sagði í íþróttafréttum í fyrradag að þessi munur væri vanvirðing við konur í knattspyrnu.  

Páll Rúnar M. Kristjánsson, hæstaréttarlögmaður, vakti athygli á málinu í gær á Facebook í kjölfar fréttaflutnings RÚV af málinu. Hann sagði það tímaskekkju að greidd væru hærri laun fyrir dómgæslu hjá körlum en konum í sömu deild. Þá telur hann að í því felist ólögmæt meingerð gagnvart þeim knattspyrnukonum sem búa við þennan órétt, og vitnaði í stjórnarskrána.

Bjarni Már Magnússon, lagaprófessor við HR, hefur rannsakað jafnrétti í íþróttum. Hann segir KSÍ bera ábyrgð á þessum mun. „Þetta er val KSÍ að hafa þetta svona það er enginn sem skyldar KSÍ að hafa þetta svona þó þetta sé byggt á fyrirmyndum erlendis frá,“ segir Bjarni.

Hann segir möguleika að tilkynna mismunun sem þessa til eftirlitsstofnunar EFTA. Íþróttahreyfingar njóti hins vegar mikils sjálfstæðis. „Tæk leið til að þrýsta á íþróttahreyfinguna, sem hefur verið notuð, er að setja ákvæði um jafnfréttismál í alla samninga við íþróttahreyfinguna, þetta er eitthvað sem sveitarfélögin hafa verið mjög virk í að gera, að hreinlega setja skilyrði um að íþróttahreyfingin sé með sín kynjajafnréttismál í lagi,“ segir Bjarni.

Gæti þessi mismunun mögulega verið brot á stjórnarskrá?
„Það er eitthvað sem mætti láta reyna á, auðveldasti farvegurinn er þá kærunefnd jafnfréttismála en þá þyrfti einhver dómari að vera tilbúinn að fara þangað,“ segir Bjarni Már.

Guðni Bergsson, formaður KSÍ, vildi ekki tjá sig um málið þegar leitast var eftir því í gær en KSÍ birti yfirlýsingu í gærkvöld vegna málsins.