Undirbúningur hafinn vegna nýrrar þjóðarhallar

Mynd með færslu
 Mynd: RÚV / Mummi Lú

Undirbúningur hafinn vegna nýrrar þjóðarhallar

10.01.2020 - 17:00
Mennta- og menningarmálaráðuneytið sendi frá sér tilkynningu í dag þar fram kemur að starfshópur hafi verið skipaður til að gera tillögur um nýjan þjóðarleikvang fyrir innanhúsíþróttir.

Lilja Alfreðsdóttir, mennta- og menningarmálaráðherra, hefur skipað starfshóp sem ætlað er að „vinna forvinnu sem upplýsir betur hvernig vinna eigi eftir nýrri reglugerð um þjóðarleikvanga, afla upplýsinga um þarfir fyrir mannvirki til lengri tíma og greina mögulega nýtingu mannvirkja sem fyrir eru eða hvort ný mannvirki þarf til þess að geta staðið fyrir alþjóðlegum keppnum.“ Líkt og fram kemur í tilkynningu ráðuneytisins í dag.

Mikið hefur borið á kvörtunum sérsambanda undan aðstöðuleysi en bæði Handknattleikssamband Íslands og Körfuknattleikssamband Íslands hafa verið á undanþágum frá alþjóðasamböndum í sinni grein vegna Laugardalshallar. Athygli vakti þegar A-landsliðum Færeyja í handbolta var gert að spila heimaleiki sína í Danmörku en þjóðarhöll Færeyinga hafði þá einnig verið á undanþágum til langs tíma.

Laugardalshöll verður 55 ára á þessu ári og er þriðja elsta þjóðahöll Evrópu, á eftir höllum í Georgíu og Úkraínu en nýjar hallir eru í bígerð í báðum löndum.

Guðmundur B. Ólafsson, formaður Handknattleikssambands Íslands verður formaður hópsins. Auk hans skipa hópinn þau: Hannes Sigurbjörn Jónsson formaður Körfuknattleikssambands Íslands, Lárus L. Blöndal forseti Íþrótta- og Ólympíusambands Íslands, Ómar Einarsson og Sif Gunnarsdóttir fyrir hönd Reykjavíkurborgar og Marta Guðrún Skúladóttir og Óskar Þór Ármannsson fyrir hönd mennta- og menningarmálaráðuneytis.

Ráðgert er að starfshópurinn skili tillögum sínum til ráðherra fyrir 1. maí.

Tilkynning mennta- og menningarmálaráðuneytisins í heild:

Lilja Alfreðsdóttir mennta- og menningarmálaráðherra hefur skipað starfshóp til þess að gera tillögur um þjóðarleikvang fyrir innanhússíþróttir. Starfshópnum er ætlað að vinna forvinnu sem upplýsir betur hvernig vinna eigi eftir nýrri reglugerð um þjóðarleikvanga, afla upplýsinga um þarfir fyrir mannvirki til lengri tíma og greina mögulega nýtingu mannvirkja sem fyrir eru eða hvort ný mannvirki þarf til þess að geta staðið fyrir alþjóðlegum keppnum.

Guðmundur B. Ólafsson, formaður Handknattleikssambands Íslands verður formaður hópsins en í honum eiga einnig sæti: Hannes Sigurbjörn Jónsson formaður Körfuknattleikssambands Íslands, Lárus L. Blöndal forseti Íþrótta- og Ólympíusambands Íslands, Ómar Einarsson og Sif Gunnarsdóttir fyrir hönd Reykjavíkurborgar og Marta Guðrún Skúladóttir og Óskar Þór Ármannsson fyrir hönd mennta- og menningarmálaráðuneytis.

„Það er mér sönn ánægja að setja af stað þennan starfshóp með þessu frábæra fólki. Það er afar brýnt að fá úr því skorið hvernig við getum tryggt að aðstaða fyrir íþróttafólkið okkar sé sem best,“ segir ráðherra.

Dagur B. Eggertsson borgarstjóri fagnar því að þessi vinna sé farin af stað: „Þá er mikilvægt að þessi grunnur sem verður lagður leiði til ákvarðana. Um leið er mikilvægt að ríkið og sérsamböndin séu öll við borðið þegar þjóðarleikvangar eru annars vegar.”

Ráðgert er að starfshópurinn skili tillögum sínum til ráðherra fyrir 1. maí nk.

Tengdar fréttir

Handbolti

„Við getum ekki beðið endalaust“

Körfubolti

Laugardalshöll barn síns tíma