Undirbúa átak til að hvetja til ferðalaga innanlands

07.03.2020 - 11:11
Mynd með færslu
 Mynd: RÚV - Þór Ægisson - RÚV
Undirbúningur að markaðsátaki sem á að miða að því að hvetja Íslendinga til að ferðast innanlands á næstu vikum og mánuðum er hafinn, að því er Þórdís Kolbrún Reykfjörð Gylfadóttir greinir frá í færslu um viðbrögð við COVID-19 kórónaveirunni á Facebook-síðu sinni.

Einnig er hafinn undirbúningur að alþjóðlegu markaðsátaki til að vekja athygli á Íslandi sem áfangastað. Ráðherrann segir að því verði ekki hleypt af stokkunum við þessar aðstæður en að það þurfi að vera klárt þegar aðstæður gefi tilefni til. Frekari aðgerðir eru til skoðunar. „Stjórnvöld munu gera það sem þarf til að hemja útbreiðslu veirunnar og vinna gegn áhrifum hennar á efnahagslífið. Sú vinna er í fullum gangi,“ segir Þórdís Kolbrún í færslunni.

Viðbragð við COVID-19 kórónaveirunni var fært á neyðarstig í gær eftir að í ljós kom að fólk hafði smitast hér innanlands. Þau smit má rekja til fólks sem hafði dvalið á svæðum sem flokkuð eru sem sýkt svæði, á Ítalíu og í Austurríki.

„Áhrifa faraldursins og óvissa honum tengd mun koma fram snemma og af þunga í ferðaþjónustu og tengdri starfsemi. Ljóst er að þar sem staðan breytist frá degi til dags verður óhjákvæmilegt að endurmeta hana og hugsanleg viðbrögð eftir framvindu mála hér og um heim allan. Væntingar eru um að eftirspurn eftir ferðaþjónustu gæti skilað sér hratt aftur ef óvissan gengur tímanlega til baka,“ segir ráðherra í færslunni. 

Þórdís Kolbrún segir í færslunni að COVID-19 eigi eftir að reyna á ýmsa þætti en að Ísland ráði vel við verkefnið. Ljóst sé að faraldurinn eigi eftir að hafa áhrif á stöðu efnahagsmála og líkt og Katrín Jakobsdóttir hafi sagt undirbúi stjórnvöld nú aðgerðir í ríkisfjármálum til að vinna gegn slaka í efnahagsmálum og það sama eigi við um Seðlabankann. 

Gengur með spritt á sér

Allir hafa hlutverki að gegna við þessar aðstæður, segir ráðherrann. Sóttvarnir virki aðeins ef samfélagið fylgi leiðbeiningum. „Þegar ég hef ekki viljað heilsa fólki með handabandi, faðma það eða kyssa og þegar ég geng um með spritt er það ekki vegna þess að ég sé hrædd um að smitast sjálf - heilsunnar vegna. Heldur skiptir máli að við öll fylgjum leiðbeiningum til þess að hefta útbreiðsluna. Þá er í kringum mig elskað fólk sem myndi ráða verr við að fá veiruna. Til dæmis mamma mín, sjúkraliðinn, í fyrirbyggjandi krabbameinsmeðferð, eldra fólk og fólk með undirliggjandi sjúkdóma. Við erum nefnilega öll í þessu saman.“

dagnyhe's picture
Dagný Hulda Erlendsdóttir
Síðast:
Þessi þáttur er í hlaðvarpi