Tveimur kílóum hent af nýtilegum mat í mánuði

Kristín Línda kynnti þessar niðurstöður á haustráðstefnu Fenúr og Umhverfisstofnunar í morgun. Fenúr er fagráð um endurnýtingu og úrgang, sem í eiga sæti fulltrúar ríkis, sveitarfélaga og einkafyrirtækja á þessu sviði. Heiti ráðstefnunnar Saman gegn sóun er einnig heiti stefnu umhverfis- og auðlindaráðherra til næstu tólf ára, sem kynnt var fyrr á árinu. Samkvæmt henni verður einblínt á matvæli í ár og næsta ár.

„Í fyrsta skipti höfum við glóðvolgar fréttir um matarsóun Íslendinga. Við fengum íslenskar fjölskyldur til þess að taka þátt í að mæla hjá sér hversu miklum mat þau eru að henda á hverjum einasta degi. Og þá líka hversu mikið af mat er í raun og veru ætur eða sem sagt þú getur nýtt. Hvað mikið er óætt, það sem þú getur raunverulega ekki nýtt og líka vökva. Við teljum að á ári að þá sé varðandi ætan mat, eða sem sagt mat sem hægt er að borða, um 23 kíló sem við hendum og í kringum 40 kíló sem að er ekki ætur. Og síðan jafnframt er þetta um 199 kíló af vökva sem við hellum niður. Og við verðum að hafa í huga að þetta er auðvitað eitthvað sem að við erum búin að hafa fyrir að vinna fyrir. Við erum búin að hafa fyrir að kaupa þetta og setja þetta inn í ísskáp og hugsanlega elda úr þessu og síðan er þessu hent. En samtals eru þetta um 282 kíló á ári per Íslending af matarleifum sem við erum að henda. Og ef við horfum nú á Íslendinga alla þá erum við komum í 93 eða næstum því 94 þúsund tonn á ári“, segir segir Kristín Linda Árnadóttir forstjóri Umhverfisstofnunar. Til viðbótar við upptalningu hennar eru 22 kíló af matarolíu og fitu.