Athugið þessi frétt er meira en 2 ára gömul.

Þrír látnir eftir flugslys í Fljótshlíð

10.06.2019 - 03:05
Mynd með færslu
 Mynd: Milla Ósk Magnúsdóttir
Þrír eru látnir og tveir voru fluttir alvarlega slasaðir á sjúkrahús með þyrlum Landhelgisgæslunnar eftir flugslys við Múlakot í Fljótshlíð á Suðurlandi í gærkvöld. Að sögn lögreglunnar á Suðurlandi er líðan þeirra slösuðu stöðug. Rannsóknardeild lögreglustjórans á Suðurlandi fer með rannsókn málsins og nýtur aðstoðar rannsóknarnefndar samgönguslysa og tæknideildar lögreglunnar á höfuðborgarsvæðinu.

Lögreglu barst tilkynning um klukkan 20:30 í kvöld um flugslys nálægt flugvellinum við Múlakot. Eldur var þá laus í flugvélinni. Fjölmennt lið lögreglu, slökkviliðs og sjúkraflutninga Heilbrigðisstofnunar Suðurlands var sent á staðinn, ásamt tveimur þyrlum Landhelgisgæslunnar, TF-LIF og TF-EIR. Fimm voru um borð í flugvélinni. 

Viðbragðsteymi Rauða krossins var sent á vettvang til að veita vitnum sálrænan stuðning.

Mynd með færslu
 Mynd: Milla Ósk Magnúsdóttir
Róbert Jóhannsson
Fréttastofa RÚV