Þjóðleikhúsráð búið að skila umsögn

29.09.2019 - 08:27
Mynd með færslu
 Mynd: RÚV
Þjóðleikhúsráð skilaði fyrir helgi umsögn sinni um umsækjendur um embætti þjóðleikhússtjóra. Sjö sóttu um stöðuna og verða þeir umsækjendur sem metnir voru hæfastir boðaðir í framhaldsviðtöl í mennta- og menningarmálaráðuneytinu á næstunni. Nýr þjóðleikhússtjóri verður skipaður frá og með áramótum.

Að því er fram kemur í svari menntamálaráðuneytisins við fyrirspurn fréttastofu hafði þjóðleikhúsráð matsviðmið frá sérfræðingum Capacent til hliðsjónar við umsögn sína. Þar er meðal annars tekið á menntunar- og hæfniskröfum. 

Einnig hefur verið auglýst eftir ráðuneytisstjóra mennta- og menningarmálaráðuneytis. Hæfnisnefnd sem var skipuð vegna þeirra skipunar skilar greinargerð til ráðherra fyrir mánaðamót. Nýr ráðuneytisstjóri verður skipaður 1. desember. Þrettán sóttu um embættið.

Þessi sóttu um stöðu þjóðleikhússtjóra

  • Ari Matthíasson, þjóðleikhússtjóri,
  • Brynhildur Guðjónsdóttir, leikari og leikstjóri,
  • Guðbjörg Gústafsdóttir,
  • Kolbrún K. Halldórsdóttir, leikstjóri,
  • Kristín Eysteinsdóttir, leikhússtjóri Borgarleikhússins,
  • Magnús Geir Þórðarson, útvarpsstjóri
  • Stefán Sturla Sigurjónsson, verkefnastjóri, leikari og rithöfundur.

Þessi sóttu um stöðu ráðuneytisstjóra

  • Friðrik Jónsson, deildarstjóri
  • Guðmundur Sigurðsson, prófessor
  • Hafdís Helga Ólafsdóttir, skrifstofustjóri
  • Helgi Grímsson, sviðsstjóri
  • Hlynur Sigursveinsson, hagfræðingur
  • Ingileif Ástvaldsdóttir, skólastjóri
  • Jón Vilberg Guðjónsson, skrifstofustjóri
  • Karitas H. Gunnarsdóttir, skrifstofustjóri
  • Magnús Einarsson, framhaldsskólakennari
  • Margrét Björk Svavarsdóttir, framkvæmdastjóri og stjórnunarráðgjafi
  • Margrét Hallgrímsdóttir, þjóðminjavörður
  • Páll Magnússon, bæjarritari
  • Þorsteinn Gunnarsson, sveitarstjóri.

Leiðrétt 8:52 Listi yfir umsækjendur um stöðu þjóðleikhússtjóra hefur verið leiðréttur.

Brynjólfur Þór Guðmundsson
Fréttastofa RÚV
Síðast:
Þessi þáttur er í hlaðvarpi