Mynd: Hrafnhildur Skúladóttir - Aðsend
Athugið þessi frétt er meira en 2 ára gömul.
„Þeir hörðustu labba yfir í byl til að fara í pottana“
Snjó hefur kyngt niður á Vestfjarðakjálka líkt og víðar eins og sjá má á myndum sem hafa verið sendar fréttastofu. Hrafnhildur Skúladóttir er forstöðumaður íþróttamiðstöðvarinnar á Hólmavík norður á Ströndum. Hún segir það ekki einfalt að reka útisundlaug í þeim veðrum sem geisað hafa.
Hrafnhildur segir það ágætis líkamsrækt að moka snjó af bökkunum á morgnana
„Það er allt á kafi í snjó hérna og það hefur bara verið brjálað veður ítrekað. Það er mikil vinna að halda útisundlauginni opinni. Dúkurinn er víraður niður svo hann fjúki ekki af og endinn er bundinn í vegg við skaflinn. Við höfum bara ekki komist í að moka það,“ segir hún.
Aðsókn í laugina hefur minnkað með veðri og vindum og ekki síst með samkomubanninu vegna kórónuveirunnar. Hrafnhildur segir samt ákveðinn hóp gesta ávalt mæta.
„Þessir hörðustu koma á hverjum degi og labba yfir í brjáluðum byl til þess að fara í pottana,“ segir hún.
Fannfergið er líka mikið fyrir vestan á Bolungarvík. Olga Tabaka sendi þessar myndir þaðan.
Þá eru fjárhúsin á bænum Stað í Steingrímsfirði á kafi í snjó. Marta Sigvaldadóttir bóndi segir litla dagsbirtu að hafa þar innanhúss.
Glittir í fjárhúsin á Stað í Steingrímsfirði
