Náin samvinna

Katrín segir að vissulega sé samvera og samvinna dansarana í hóp eins og Íslenska dansflokknum mjög náin og hún geti verið snúin. „Ég er líka stundum að setja þeim fyrir verkefni eins og að biðja þau að hreyfa sig saman í takt, en láta bara vera nokkurra sentimetra bil á milli líkama. Þá þarf fólk að leita málamiðlana til að vinna saman. En ef maður víkkar þetta út þá er þetta auðvitað eilífðarverkefni hjá okkur öllum sem samfélagi og sem manneskjum, við erum öll að reyna að lifa saman. Þetta er bara smækkuð mynd af því.“

Annað og meira en skilningur

En hvernig er best, fyrir þann sem kemur að nútímadansi með opnum hug, að nálgast listformið?

„Mér finnst mjög gott að segja fólki að reyna að sleppa því að ætla að reyna að skilja þetta eins og frásögn í hefðbundu leikhúsi, heldur frekar að hugsa hvernig þú upplifir myndlist eða tónlist sem þú skilur að einhverju leyti en er líka mikilvægt að upplifa og skynja með öðrum hætti. Við erum hins vegar öll orðin svo læs á myndmál í dag og við erum læs á líkamstjáningu þannig að það er hægt að lesa ýmislegt í þetta verk. Það er til dæmis um það hvernig einstaklingar reyna að fara nær og nær hvor öðrum, kannski lengra en mögulegt er að fara, nánst inn í hvern annan. Það er bara um að gera að reyna að kúpla sig út úr hversdeginum og horfa á þetta eins og ljóð eða tónlist.“

Viðtalið við Katrínu Gunnarsdóttur um Þel má heyra hér í spilaranum að ofan. Allar nánari upplýsingar má finna á heimasíðu dansflokksins. Tónlistin í innslaginu er úr verkinu og er eftir Baldvin Þór Magnússon.