Athugið þessi frétt er meira en 2 ára gömul.

Sundlaugargestir reknir upp úr í þrumuveðri

17.07.2019 - 15:09

Innlent · Suðurland · Sveitarfélagið Ölfus

Mynd: CC / Pxhere

„Ég heyrði einhverjar svakalegar drunur og hélt að það væri verið að sprengja eitthvað niður á höfn. En svo var þetta bara eins og jarðskjálfti og þessu fylgdi ein mesta rigning sem ég hef séð á ævi minni,“ segir Hákon Svavarsson, póstburðarmaður í Þorlákshöfn sem átti fótum sínum fjör að launa þegar mikið eldingaveður gekk yfir bæinn á þriðja tímanum í dag. Nokkur fjöldi var í sundlauginni í Þorlákshöfn þegar veðrið gekk yfir og voru allir beðnir um að vera í innilauginni á meðan á því stóð.

Samkvæmt upplýsingum frá Veðurstofu Íslands mældust níu eldingar á þeim rúmlega hálftíma sem veðrið gekk yfir Þorlákshöfn.

Óli Þór Árnason, veðurfræðingur á veðurstofunni, segir að enn séu bólstrar í myndun sem gætu gefið eldingar en það sé jafn líklegt og það sé ólíklegt. „Það eru ýmsir útvaldir en ekkert sjálfgefið,“ segir Óli.

Hann telur hins vegar ólíklegt að eldingaveðrið nái yfir til höfuðborgarsvæðisins þar sem hafgolan gæti haldið bólstrunum í burtu. Það gæti þó gerst þegar hafgolan gefur eftir.

Hákon póstburðarmaður segist aldrei hafa séð annað eins og líkir þessu við bíómynd. Undir það tekur starfsmaður í ráðhúsinu sem tók myndskeið af rigningunni sem sést hér að ofan.

Heilbrigðisstofnun Suðurlands vakti athygli á hættunni á þrumuveðrinu í gær og bað fólk um að fara upp úr heitum pottum og sundlaugum ef það yrði þrumuveðursins vart. Samkvæmt upplýsingum frá sundlauginni í Þorlákshöfn voru talsvert margir í sundlauginni þegar veðrið hófst og var fólk beðið um að fara í innilaugina á meðan á því stóð. Starfsmaður sundlaugarinnar sagði fólk þó hafa haldið ró sinni.