Athugið þessi frétt er meira en 2 ára gömul.

Stríðinn listamaður þykist banna myndatökur

Mynd: Þórdís Alda Sigurðardóttir / Þórdís Alda Sigurðardóttir

Stríðinn listamaður þykist banna myndatökur

21.08.2019 - 17:07

Höfundar

Á Snæfellsnesi má finna ýmis óvænt listaverk sem komið hefur verið fyrir vítt og breitt um svæðið. Verkin tilheyra sýningunni Umhverfing III og eru fjölbreytt verk listamanna sem tengjast svæðinu. Hefur eitt þeirra vakið hörð viðbrögð ferðamanna sem hafa sumir ekki húmor fyrir stríðninni.

Akademía skynjunarinnar stendur fyrir sýningunni Umhverfing III, sem teygir sig yfir allt Snæfellsnesið og er umfangsmesta sýning sem sett hefur verið upp á Íslandi, að minnsta kosti landfræðilega. Akademían samanstendur af þeim Önnu Eyjólfsdóttur, Þórdísi Öldu Sigurðardóttur og Ragnhildi Stefánsdóttur en rúmlega 70 listamenn eiga verk á sýningunni. Listamennirnir eiga allir rætur að rekja til Snæfellsness með einum eða öðrum hætti. Verkin eru meðal annars eftir nokkra af okkar fremstu og þekktustu myndlistamönnum; Erró sem auðvitað ólst upp á Snæfellsnesi, Sigurð Kristján Guðmundsson, Rúrí og Diether Roth sem hefur djúp tengsl við Snæfellsnesið. Á meðan Dieter lifði átti hann bústað á Hellnum og var svo annt um sveitina að hann var jarðsettur þar.

Þetta er þriðja sýning sinnar tegundar sem Akademían stendur fyrir, sú fyrsta var í Skagafirði en önnur á Fljótsdalshéraði. Hugmyndin á bak við sýningaröðina að fá listamenn sem hafa einhver tengsl eða tengingu við þennan tiltekna landshluta til að sýna list sína. Verkin eru sýnd í samkomusölum, á víðavangi, kaffihúsum, bæjarskrifstofum, hótelum og víðar.

Megas útvarpað frá gömlu mastri

Sýningin teygir sig svo langt að það er jafnvel hæpið að ná að skoða hana alla á einum degi, segir Jón Proppé listfræðingur sem var með leiðsögn um sýninguna um helgina. Leiðsögnin tók tvo og hálfan tíma, en náði samt aðeins yfir hluta af sýningunni. Tengivagninn á Rás 1 sótti Jón heim og fékk hann til að segja frá sýningunni. „Þetta er eins og fjársjóðsleit stundum,“ segir Jón og glottir.

Verkin eru fjölbreytt og af öllum toga, málverk, skúlptúrar, innsetningar í náttúrunni og jafnvel útvarpsverk. „Frá gömlu mastri sem stendur við Öxl er hægt að hlusta á skáldsögu sem Megas skrifaði um fjöldamorðingjann Axlar-Björn, út frá sögunni um hann. Það er hægt að hlýða á flutning Megasar í nokkurra kílómetra radíus þannig að þegar keyrt er eftir Snæfellsnesi sunnanverðu má stilla á 105.1 og heyra óminn af þessari hryllingssögu frá sextándu öld.“ 

Við Búðarkot má einnig finna tvívíðan skúlptúr eftir Æsu Dórótheu, í fjörunni eru skúlptúrar eftir Guðrúnu Veru Hjartardóttur sem eru faldir á milli stokka og steina svo það getur verið erfitt að greina á milli grjótsins og skúlptúranna. 

Mynd með færslu
 Mynd: Þórdís Sigurðardóttir - Þórdís Alda Sigurðardóttir
Akademía skynjunarinnar þær Ragnhildur Stefánsdóttir, Þórdís Alda Sigurðardóttir og Anna Eyjólfs við skipulagningun á sýningunni Umhverfing II

Reykjavík einokar menninguna

„Við á Íslandi höfum öll einhver tengsl við sveitina, eigum afa, ömmu eða einhvern nákominn sem býr þar eða höfum sjálfum verið í sveit,“ segir Jón. Hann segir að listamenn utan af landi finni gjarnan fyrir pressu á að flytja til einu borgar landsins til að eiga möguleika á að vera í hringiðunni, því borgin safni til sín menningunni. „Þeir tilheyra samt sinni sveit og það hefur farið vaxandi síðustu ár áhuginn á að halda sýningar úti á landi. Þá gefst sveitungum tækifæri til að sjá hvað hann Siggi og hún Rúna sem fluttu suður fyrir 20 árum hafa verið að bjástra.“

Túristar gáttaðir á ljósmyndabanni í náttúrunni

Sýningin hefur vakið jákvæð viðbrögð gesta og heimamanna en eitt verkið er þó umdeilt. Logi Bjarnason valdi sér þrjá staði á Snæfellsnesi sem allir eru vinsælir viðkomustaðir ferðamanna. „Þarna geturðu tekið ljósmyndir yfir eyjarnar og Breiðafjörðinn. Logi útbjó skilti sem á stendur „Ljósmyndun bönnuð“ með táknmynd af myndavél og striki yfir. Uppátækið hefur ruglað marga í ríminu. 

„Þetta olli miklum heilabrotum hjá ferðamönnum og hörðum viðbrögðum frá aðilum í ferðaþjónustunni. Mér skildist í gær að búið væri að snúa skiltinu við,“ segir Jón glettinn. „Þetta er auðvitað bara smá húmor en ekki víst að allir taki þessu sem svo.“

Kristján Guðjónsson og Halla Þórlaug Óskarsdóttir ræddu við Jón Proppé í Tengivagninum og má hlýða á viðtalið allt í spilaranum efst í fréttinni.

Tengdar fréttir

Umhverfismál

Ólafur Elíasson tekur yfir veitingastað Tate

Myndlist

Myndlistarsýning fyrir blinda og sjónskerta

Leiklist

Andlegt fyllirí á Suðureyri um helgina

Myndlist

Myndaði meðgöngu í skugga geðhvarfa