Athugið þessi frétt er meira en mánaðargömul.

Strandvegi á Sauðárkróki lokað vegna sjógangs

10.02.2020 - 11:42
Mynd með færslu
 Mynd: Sveitarfélagið Skagafjörður - Facebook
Strandvegi á Sauðárkróki hefur verið lokað vegna sjógangs. Sveitarfélagið Skagafjörður deilir myndbandi á Facebook sem sýnir glögglega sjóganginn. Vegfarendur eru beðnir að halda sig frá Strandveginum, frá Hegrabraut og að hringtorginu á Eyrinni. Veginum hefur verið lokað þar til aðstæður breytast. 

Norðanhríð er nú víða um land. Gul viðvörun er í gildi fyrir Vestur- og Norðurland vegna norðan hvassviðris eða storms með snjókomu og skafrenningi. Veður tók að versna í gærkvöld og víða er orðið mjög hvasst. 

Á áttunda tímanum í morgun lýsti Vegagerðin yfir hættustigi í Ólafsfjarðarmúla vegna snjóflóðahættu og vegurinn er nú lokaður. Það sama má segja um Siglufjarðarveg, milli Ketiláss og Siglufjarðar.

Samkvæmt upplýsingum frá Vegagerðinni er vetrarfærð í öllum landshlutum og veðrið hefur áhrif á akstursskilyrði fyrir norðan og vestan. Ófært er á Þröskuldum og beðið með mokstur vegna veðurs.