Athugið þessi frétt er meira en 9 ára gömul.

Stjórnarflokkar tapa fylgi

02.10.2012 - 18:00
Mynd með færslu
 Mynd:
Ríkisstjórnarflokkarnir tapa fylgi samkvæmt nýjum Þjóðarpúlsi Gallup en Sjálfstæðisflokkurinn bætir við sig. Enginn flokkanna, sem bjóða fram í fyrsta skipti, nær manni inn á þing en lítið vantar uppá hjá Bjartri framtíð.

Sjálfstæðisflokkurinn mælist sem fyrr með mest fylgi 37,1 prósent og bætir við sig frá síðustu könnun. Ríkisstjórnarflokkarnir tapa hins vegar fylgi. Mælast nú með tveimur prósentustigum minna fylgi en í síðustu könnun. Samfylkingin mælist með 19,4 prósent en Vinstri grænir með 12,4 prósent.

Átök innan þingflokks Framsóknar virðast ekki hafa áhrif á fylgi flokksins sem bætir raunar örlitlu við sig. Flokkurinn mælist nú með 14,2 prósenta fylgi. Það er svipað og í september.

Nýju framboðin fjögur mælast með talsvert minna fylgi. Björt framtíð, Guðmundar Steingrímssonar og Heiðu Kristínar Helgadóttur, mælist með mest þeirra og er næst því að rjúfa fimm prósenta múrinn sem þarf til að ná manni inn á þing. Flokkurinn mælist með 4,9 prósent. Næst koma Hægri grænir, framboð Guðmundar Franklíns og fleiri, Dögun og Samstaða, Lilju Mósesdóttur, rekur lestina með 2,4 prósent.

Könnunin var gerð 30. ágúst til 27. september. 5.591 var í úrtakinu en svarhlutfallið var rétt rúm sextíu prósent.

71,6 prósent tók afstöðu til flokka. Tæp 14 prósent ætla ekki að kjósa eða ætla að skila auðu en litlu fleiri gáfu ekki upp afstöðu sína.