Mynd: RÚV
Sölubann á lækningatæki til Íslands með öllu ólíðandi
„Ég ætla að gera ráð fyrir að Evrópusambandið standi við skuldbindingar sínar gagnvart EFTA-ríkjunum og banni ekki sölu á þessum útbúnaði til okkar,“ segir Guðlaugur Þór Þórðarson utanríkisráðherra. Á undanförnum dögum hefur utanríkisráðuneytið fengið fregnir af því að innflytjendur lækningatækja hér á landi hafi fengið þau svör frá birgjum í Evrópu, að Evrópusambandið sé búið að leggja bann við því að selja slík tæki út fyrir ríki sambandsins. Því sé ekki hægt að selja þau til Íslands.
Á meðal þess sem ekki má selja til Íslands tímabundið, samkvæmt banni Evrópusambandsins, eru andlitsgrímur og hlífðarfatnaður. Mikil eftirspurn er eftir slíkum vörum þessa dagana, vegna COVID-19 faraldursins.
Gengur gegn EES-samningnum
Guðlaugur Þór hefur þegar mótmælt þessu sölubanni. „Við höfum í gær og í dag komið þeim sjónarmiðum kirfilega á framfæri við ráðamenn ESB. Við eigum jafnframt náið og gott samstarf við stjórnvöld í Noregi og annarra EFTA-ríkja um að koma þessu máli í réttan farveg sem allra fyrst,“ segir Guðlaugur Þór.
„Það er með öllu ólíðandi að íslenskir innflytjendur fái þau svör hjá sínum birgjum að bannað sé að flytja vörurnar sem um ræðir til Íslands. Bannið gengur gegn öllu því sem EES-samningurinn byggir á og við gerum ráð fyrir því að úr þessu leysist mjög fljótt,“ segir Guðlaugur Þór.
