Snarpur skjálfti skammt frá Hveragerði

10.01.2020 - 13:25
Mynd með færslu
 Mynd: Geir Ólafsson - RÚV
Jarðskjálfti varð rétt eftir klukkan eitt í dag, fjóra kílómetra suð-suðaustur af Hveragerði. Samkvæmt upplýsingum á vef Veðurstofunnar er fyrsta mat á skjálftanum að hann sé af stærðinni 3,9. Tilkynningar hafa borist um að hann hafi fundist í Hveragerði, Selfossi og á höfuðborgarsvæðinu.

Að sögn Gyðu Bjargar Elíasdóttur, sem býr í Hveragerði, var skjálftinn stuttur en mjög snarpur. Hún segir í samtali við fréttastofu að myndir hafi skekkst á veggjum hjá henni. Ekkert hafi þó skemmst enda skápar og hillur festar vel við veggina.

Samkvæmt upplýsingum frá sérfræðingi Veðurstofunnar varð skjálftinn á sprungu milli Hveragerðis og Selfoss. Eftirskjálftar sem mælst hafa eru mun minni en fyrsti skjálftinn. 

Sérfræðingur Veðurstofunnar segir ómögulegt að segja til um hvort reikna megi með áframhaldandi eftirskjálftum eða hvort skjálftavirknin deyr fljótlega út. 

Fannstu fyrir skjálftanum? Sendu okkur upplýsingar á [email protected] eða í gegnum Facebook-síðu okkar RÚV - fréttir.

 

Jón Hákon Halldórsson
Fréttastofa RÚV