Skoða hvort illvígar veirur hafi drepið kanínurnar

Mynd með færslu
 Mynd:
Matvælastofnun og Tilraunastöð Háskóla Íslands að Keldum vinna að því að finna ástæður þess að fjöldi kanína hefur veikst og drepist í Elliðaárdal. Eins og fréttastofa greindi frá í gær voru yfir 50 hræ hirt í dalnum á síðustu dögum. Helstu möguleikar sem er verið að skoða er brátt veirusmit eða eitrun af einhverju tagi. Fólki er ráðlagt að taka ekki með sér kanínur heim til að forðast útbreiðslu smits ef um slíkt er að ræða. 

Í nýrri tilkynningu frá MAST kemur fram að ekkert bendi til eitrunar af völdum músa- eða rottueiturs, frostlagar eða salta vegna hálkuvarna. Þeir veirusjúkdómar sem helst geta leitt kanínur hratt til dauða eru annars vegar smitandi lifrardrep og hins vegar myxomaveirusýking.  

Lifradrep hefur einu sinni komið upp hér á landi, en það var árið 2002 á Suður- og Suðvesturlandi. Sjúkdómurinn dró mikinn fjölda af kanínum til dauða á kanínubúum og í heimahúsum áður en náðist að ráða niðurlögum hans. Kanínur drepast oftast á innan við einum sólarhring vegna lifrardreps, en á um tveimur sólarhringum vegna myxomaveirusýkingar.

Báðir þessir veirusjúkdómar sýkja eingöngu kanínur. Öðrum dýrum eða fólki stafar ekki hætta af smiti.  

Kanínueigendum ráðlagt að þvo skó og fatnað vel

MAST vill koma því á framfæri að fólk með kanínur heima fyrir ætti að forðast að fara í Elliðaárdalinn á meðan óvíst er hvort um annan hvorn þessara sjúkdóma er að ræða. Veiran getur lifað lengi í umhverfi smitaðra kanína og mjög hætt við að fólk beri veiruna með sér heim á skóm og fatnaði. Ef kanínueigendur hafa gengið um svæðið er þeim ráðlagt að þvo fatnað í að minnsta kosti 50 gráðu hita og setja skóbotna í klórblöndu 1:10. Ólíklegt er að sótthreinsispritt og sápa dugi til að drepa veiruna. 

Illmögulegt er að bjarga smituðum kanínum og því ætti fólk alls ekki að taka veikar kanínur heim ef kanínur eru heima fyrir, segir í tilkynningunni. Starfsfólk Reykjavíkurborgar fylgist með kanínunum, kemur veikum dýrum til dýralæknis og kemur hræjum í örugga eyðingu. 

 

andriyv's picture
Andri Yrkill Valsson
Fréttastofa RÚV
Síðast:
Þessi þáttur er í hlaðvarpi