Athugið þessi frétt er meira en mánaðargömul.

Skipuleggja loftbrú frá Kanaríeyjum til Íslands

Mynd með færslu
 Mynd: Bjarni Rúnarsson - RÚV
Ferðaskrifstofurnar VITA, Ferðaskrifstofa Íslands og Heimsferðir, í samstarfi við Icelandair, hafa skipulagt loftbrú frá Kanaríeyjum til Íslands, í gegnum Las Palmas og Tenerife, til að flýta för þeirra fjölmörgu Íslendinga sem staddir eru á eyjunum og áttu bókað flug heim fyrir páska. Þetta kemur fram í tilkynningu frá Icelandair, VITA, Ferðaskrifstofu Íslands og Heimsferðum.

Útgöngubann er í gildi á eyjunum og verið er að loka fjölmörgum hótelum, að því er fram kemur í tilkynningunni.

Þar segir að Icelandair hafi sett upp 15 flug næstu fjóra daga, þar sem ferðaskrifstofurnar í samráði við Ferðamálastofu flýta för allra farþega sem eru á þeirra vegum á eyjunum, en þeir eru á milli tvö og þrjú þúsund talsins. Reiknað er með að allir farþegarnir verði komnir heim á föstudag.

„Vegna fjölda fyrirspurna hefur Ferðaskrifstofan VITA einnig hafið almenna sölu á flugferðum sem áætlaðar eru seinnipartinn á föstudag frá Tenerife og Kanarí. Flugi verður bætt við ef mikil eftirspurn verður. Markmið Icelandair, ferðaskrifstofanna og Ferðamálastofu er að gefa öllum þeim sem ekki hafa þegar gert ráðstafanir til að komast aftur heim til Íslands tækifæri til þess á næstu dögum,“ segir í tilkynningunni.