Athugið þessi frétt er meira en 3 ára gömul.

Sigrún Edda fjallkona í Reykjavík

17.06.2018 - 11:57
Mynd: RÚV / RÚV
Sigrún Edda Björnsdóttir leikkona var fjallkona í Reykjavík í dag. Hún las ljóð eftir Lindu Vilhjálmsdóttur við hátíðardagskrá á Austurvelli.

Hún fetaði þar í fótspor móður sinnar, Guðrúnar Ásmundsdóttur, sem var fjallkona í Reykjavík fyrir 53 árum. 

Á Vísindavefnum segir að hugmyndin um konu sem þjóðartákn hafi víða verið á kreiki í Evrópu á 18. og 19. öld. Hún hafi tengst rómantísku stefnunni og hugmyndinni um móður jörð. 

Árið 1947 hafi ávarp fjallkonunnar verið flutt í fyrsta sinn við hátíðahöldin 17. júní í Reykjavík. Í hlutverkið valdist Alda Möller leikkona. 

„Á lýðveldishátíðinni á Þingvöllum 17. júní 1944 var búið að ráðgera að fjallkonan, ung stúlka í skautbúningi, skyldi hylla fána Íslands. Sú útvalda var Kristjana Geirsdóttir Thorsteinsson, dótturdóttir Hannesar Hafstein fyrsta ráðherra Íslands. Hið alræmda slagviðri þennan dag kom þó í veg fyrir að af þessu gæti orðið.“

Í Fjallkonutali á vefnum 17. júní má sjá hverjar hafa farið með hlutverkið. Þar segir að fjallkonan klæðist skautbúningi í vörslu Árbæjarsafns og við hann sé forláta stokkabelti með vínviðarmunstri úr silfri og brjóstnæla í stíl.

Hver er uppruni fjallkonunnar og hvaða hlutverki gegnir hún?

Björn Friðrik Brynjólfsson
Fréttastofa RÚV