Sigríður, Bergþóra og Bergrún Íris fá Fjöruverðlaun

Fjöruverðlaunin 2020
 Mynd: Elva Björk Ellertsdóttir - Fjöruverðlaunin

Sigríður, Bergþóra og Bergrún Íris fá Fjöruverðlaun

15.01.2020 - 16:00

Höfundar

Bergþóra Snæbjörnsdóttir, Sigríður Kristín Þorgrímsdóttir og Bergrún Íris Sævarsdóttir, höfundar bókanna Svínshöfuð, Jakobína: Saga skálds og konu og Kennarans sem hvarf, fá Fjöruverðlaunin í ár.

Fjöruverðlaunin, bókmenntaverðlaun kvenna, voru afhent við hátíðlega athöfn í Höfða 15. janúar 2020.

Verðlaunin hlutu Bergþóra Snæbjörnsdóttir, fyrir skáldsöguna Svínshöfuð, í flokki fagurbókmennta, Sigríður Kristín Þorgrímsdóttir, fyrir bókina Jakobína: Saga skálds og konu, í flokki fræðirita og rita almenns efnis, og Bergrún Íris Sævarsdóttir, fyrir bókina Kennarinn sem hvarf, í flokki barna- og unglingabókmennta.

Breyskar persónur í grimmum heimi

Í rökstuðningi dómnefndar um Svínshöfuð eftir Bergþóru Snæbjörnsdóttur segir að bókin sé ljómandi vel skrifuð og margþætt.

Mynd með færslu
 Mynd: RÚV
Svínshöfuð eftir Bergþóru Snæbjörnsdóttur.

„Þar fléttast saman sögur ólíkra persóna; eldri manns sem elst upp við Breiðafjörð, húsmóður í Kópavogi og ungs innflytjanda frá Kína. Öll eiga þau það sameiginlegt að vera jaðarsett og einangruð, hvert á sinn hátt. Heimurinn sem Bergþóra dregur upp er grimmur en persónur hennar eru heilsteyptar og þótt lýsingar séu oft gróteskar eru þær skapaðar af stakri næmni fyrir breyskleika mannfólksins. Bergþóra dregur fram áhrifaríkar myndir sem sitja lengi í lesandanum og vald hennar á tungumálinu er slíkt að unun er að lesa Svínshöfuð.“

Ómetanleg innsýn í í líf og hugarheim áhrifamikils skálds

Í rökstuðningi dómnefndar um bók Sigríðar Kristínar segir að bókin veiti ómetanlega innsýn í líf og hugarheim Jakobínu Sigurðardóttur. 

Mynd með færslu
 Mynd: RÚV/Forlagið
Jakobína: Saga skálds og konu efti Sigríði Kristínu Þorgrímsdóttur.

„Jakobína er án efa með merkilegri skáldum síns tíma á Íslandi, en ferlið var oft flókið. Bókin segir frá löngun í menntun, togstreitu gagnvart hjónabandi og síðar húsmóðurhlutverkinu, og skáldastarfinu sem hún brann fyrir alla ævi.  Bókin er skrifuð af dóttur Jakobínu, Sigríði Kristínu Þorgrímsdóttur, sem tvinnar einstaklega vel saman sögu þessarar áhugaverðu konu, bréfaskrif milli Jakobínu og hennar nánustu, og ljóð eftir hana og aðra.“

Lifandi og margræð spennusaga fyrir börn

Í rökstuðningi dómnefndar um bók Bergrúnar Írisar Sævarsdóttur, Kennarinn sem hvarf, segir að þar sé fjölkunnugur rithöfundur og afbragðs listakona á ferð.

Mynd með færslu
 Mynd: RÚV
Kennarinn sem hvarf eftir Bergrúnu Írisi Sævarsdóttur.

„Kennarinn sem hvarf er fimlega byggð spennusaga sem heldur lesendum á aldrinum 9-12 ára föngnum til enda. Spennusagnaformið keyrir söguna áfram en sagan er allt í senn, hröð og skemmtileg og byggð samkvæmt lögmálum hefðbundinnar frásagnar. Söguna segir 12 ára gömul stúlka sem ásamt bekkjarfélögum sínum leita horfins kennara og leysa um leið flóknar þrautir. Persónurnar virðast við fyrstu sýn fremur einfaldar og staðlaðar en þegar á reynir eru þær ekki byggðar upp af staðalímyndum heldur verða þær lifandi og margræðar þegar á frásögnina líður rétt eins og frásögnin sjálf. Bygging bókarinnar ásamt persónusköpun fleytir þessari heildstæðu sögu hátt og færir Bergrúnu Írisi Sævarsdóttur Fjöruverðlaunin 2020.“

Þetta í fjórtánda sinn sem Fjöruverðlaunin eru veitt og í sjötta sinn síðan borgarstjóri Reykjavíkur, bókmenntaborgar UNESCO, gerðist verndari verðlaunanna og bauð Dagur B. Eggertsson gesti velkomna og afhenti verðlaunahöfum blóm. Verðlaunahafar fá verðlaunagripi gerða af listakonunni Koggu.

 

Tengdar fréttir

Bókmenntir

Saga um skáld og þolgæði kvenna andspænis valdi

Bókmenntir

Skrifar fyrir börn með virðinguna að leiðarljósi

Bókmenntir

Listilegar lýsingar og enginn byrjendabragur

Bókmenntir

Innra með leynast bæði gerandi og þolandi