Síðasti makríllinn fyrir verslunarmannahelgi

01.08.2019 - 16:13
Mynd með færslu
 Mynd: svn.is
Nú eru um 35 þúsund tonn af makríl komin á land eftir að veiðar hófust í byrjun júlí. Sjómenn eru sammála um að veiðarnar gangi mun betur en í fyrra og meira sé af makríl innan lögsögunnar nú, en á síðustu vertíð.

Í fiskiðjuveri Síldarvinnslunnar í Neskaupstað er verið að vinna síðasta makrílinn fyrir verslunarmannahelgi. Ekkert verður unnið þar um helgina.

Beitir NK kom til Neskaupstaðar í nótt með 600 tonn af makríl og á heimasíðu SVN segist Tómas Kárason, skipstjóri, bjartsýnn varðandi framhald makrílvertíðarinnar. „Þetta er miklu betra en í fyrra og það virðist vera meiri makríll innan lögsögunnar en þá var. Nú eru bátarnir að fiska bæði hér austurfrá og eins við Vestmannaeyjar. Við vorum allan þennan túr austur úr Hvalbaknum og það var sífellt að ganga þarna makríll.“

Hann segir þó að gengið hafi heldur illa að veiða yfir nóttina en betur veiðist á daginn. Við makrílveiðarnar sé þetta oft ýmist í ökkla eða eyra. Stundum fást einungis nokkur tonn í holi en svo séu þeir að fá allt upp í 400 tonna hol.

Jón Gunnar Sigurjónsson, verkstjóri í fiskiðjuveri SVN, segir að vinnslan á makrílnum gangi mjög vel. Unnin séu 600-800 tonn á sólarhring, en afköstin fari eftir vinnsluaðferð. Makríllinn sé ýmist frystur heill eða hausskorinn. „Nú er búið að taka á móti um 6000 tonnum á vertíðinni,“ segir hann. Hjá okkur landa fjögur skip og veiðar þeirra eru skipulagðar þannig að ávallt sé ferskt og gott hráefni til staðar fyrir vinnsluna.“

 

agusto's picture
Ágúst Ólafsson
Fréttastofa RÚV
Síðast:
Þessi þáttur er í hlaðvarpi