SI vill meiri áherslu á nýsköpun í fjárfestingarátakinu

Mynd með færslu
 Mynd: RÚV
Alþingi ræðir í dag tillögu fjármálaráðherra um 15 milljarða framkvæmdaátak á þessu ári til að vinna gegn samdrætti í hagkerfinu vegna kórónuveirufaraldursins. Stærsti hluti þess verður í samgöngumannvirkjum en einnig fara tveir milljarðar í viðhald og endurbætur fasteigna. Framkvæmdastjóri Samtaka iðnaðarins vill að ríkið fjárfesti fyrir meira en gert er ráð fyrir og kallar eftir frekari aðgerðum í byggingariðnaði.

 

Alþingi kemur saman klukkan hálf tvö og mælir fjármálaráðherra fyrir þingsályktunartillögu um framkvæmdaátakið. Stærsti hluti 15 milljarðanna fara í samgöngumannvirki, þar af tæpir fimm í vega- og brúargerð og viðhald vega. Rúmur hálfur milljarður fer í flugvelli á Akureyri og Egilsstöðum. Tveir milljarðar fara í viðhald og endurbætur fasteigna, 700 í nýbyggingar og 350 í framkvæmdir við ofanflóðavarnir.

Sigurður Hannesson, framkvæmdastjóri Samtaka iðnaðarins, segir jákvætt hve stjórnvöld bregðist hratt við og að þau hafi lýst því yfir að meira verði gert ef þarf. Hins vegar hefði hann viljað sjá enn frekari fjárfestingar og að þær væru með aðeins öðrum hætti.

„Við hefðum viljað sjá eitthvað varðandi byggingamarkaðinn sem er að nálgast frostmark, þar eru atriði eins og hlutdeildarlán sem myndi hjálpa til. Við hefðum líka viljað sjá meiri áherslu á nýsköpun og skapandi greinar,“ segir Sigurður.

Til að mynda með auknum framlögum í tækniþróunarsjóð og endurgreiðslu vegna rannsóknar- og þróunarkostnaðar og einnig kvikmyndaframleiðslu. Þetta væru verkefni sem myndu skila árangri hratt, verja störf og skapa verðmæti í landinu. Hann segir að of mikil áhersla hafi verið á vöxt í einni grein í einu, fjármálaþjónustan á fyrsta áratugi aldarinnar og ferðaþjónustan á öðrum. 

„En núna er tækifærið að fjölga eggjunum í körfunni og vera með aðeins dreifðari samsetningu og þar leikur nýsköpun lykilhlutverk,“ segir hann.

 

sigridurda's picture
Sigríður Dögg Auðunsdóttir
Síðast:
Þessi þáttur er í hlaðvarpi