„Sennilega mesta áfall“ þjóðarinnar eftir hrun

17.11.2019 - 12:35
Mynd: RÚV / RÚV
Þorsteinn Pálsson, fyrrverandi formaður Sjálfstæðisflokksins og forsætis-, sjávarútvegs-, fjármála- og dómsmálaráðherra, segir Samherjamálið þannig vaxið að nú þurfi að fá óháða aðila til að meta hvað Samherji hafi borgað samanlagt fyrir veiðirétt í Namibíu og hvernig það sé í samræmi við greiðslur hér heima. Sjávarútvegsráðherra þurfi að hafa forystu um það. Þorsteinn var gestur Silfursins hjá Agli Helgasyni í dag.

„Þetta er auðvitað bara mjög alvarlegt og sennilega mesta áfall sem þjóðin hefur orðið fyrir eftir hrun,“ segir Þorsteinn.

„Annars vegar þá eru þarna uppi álitamál sem fara fyrir dómstóla, spurning hvort þetta voru mútur og skattsvik. Það mun taka mörg ár. Hitt lítur að því að byggja upp traust, sem hefur hrunið á milli eigenda auðlindarinnar og þeirra sem hafa nýtingarréttinn.“

Þorsteinn segir að nú sé það hlutverk sjávarútvegsráðherrans að hafa forystu í því að byggja þetta traust upp. „Menn hafa verið að gagnrýna hann fyrir að hafa hringt í vin sinn og spyrja hvernig honum liði. Ég get ekki tekið undir þá gagnrýni. Mér finnst það bara vera eðlilegur drengskapur og íslenskt. Það á ekki að gera það pólitískt tortryggilegt. En mér finnst að hann hafi líka átt að hringja í þjóðina og spyrja hvernig henni liði.“

Magnús Geir Eyjólfsson
Síðast:
Þessi þáttur er í hlaðvarpi