Sendu okkur stuttmynd úr sóttkvínni

Mynd með færslu
 Mynd: Pexels

Sendu okkur stuttmynd úr sóttkvínni

17.03.2020 - 15:12
Nú þegar samkomubann er í gildi, framhaldsskólar og háskólar eru lokaðir og margir eru í sóttkví getur verið erfitt að finna sér eitthvað að dunda sér við. Eitt af því sem er þá tilvalið að gera er að læra eitthvað nýtt, eins og til dæmis hvernig maður getur gert stuttmynd.

RÚV núll færir þér hér nokkur frábær ráð frá framleiðanda deildarinnar sem gott er að hafa í huga þegar gera á myndband.

Mynd með færslu
 Mynd: Gunnar Ingi
Gunnar Ingi Jones, framleiðandi RÚV núll

1. Passaðu upp á hljóðið, fólk tekur miklu frekar eftir slæmu hljóði en slæmri mynd. Það þýðir að þú ættir að reyna að taka ekki upp í húsi við flugvöllinn eða með myndavélina við hliðina á háværum ísskáp. Og svo er auðvitað mikilvægt að tala í þá átt sem hljóðneminn er.

2. Notaðu þá myndavél sem þú hefur aðgang af, góðar græjur eru ekki það sama og góður kvikmyndagerðamaður. Það er hægt að gera ýmislegt bara með símanum sínum. 

3. Notaðu vini þína, þeir eru bæði ódýrt vinnuafl og svo er ógeðslega gaman að búa til hluti í góðum vinahóp. Bara passa tvo metrana núna!

4. Notaðu nátturulega birtu, það er hægt að komast ótrúlega langt á því að nota sólarljósið og að kunna beita því. Reyndu bara að snúa alltaf í ljósið og taka ekki upp beint á móti því.

5. Sú saga sem þú vilt segja er og á alltaf að vera í forgang, öll tæknileg atriði eru bara litlar áskoranir sem alltaf hægt er að sigrast á.

Ef þú leggst í stuttmyndagerð viljum við endilega fá að sjá afraksturinn. Svo áttu jafnvel eina stuttmynd á lager nú þegar, við viljum líka sjá hana. Sendu okkur þína mynd í gegnum tölvupóst á [email protected]. Við mælum með því að nota síður á borð við WeTransfer eða Google Drive til að senda okkur myndirnar í sem bestum gæðum. Með þínu leyfi viljum við svo sýna bestu stuttmyndirnar eða myndböndin sem okkur berast.