Segir Samherjamálið skaða orðspor Íslands

17.11.2019 - 12:27
Mynd: RÚV / RÚV
Svein Harald Øygard, fyrrverandi seðlabankastjóri á Íslandi, telur víst að norsk lögregluyfirvöld rannsaki Samherjamálið. Hann óttast að íslenskir fjárfestar muni eiga erfiðara um vik vegna þess orðsporshnekkis sem málið hefur á Ísland og íslenskt viðskiptalíf.

Svein Harald Øygard, sem gegndi embætti seðlabankastjóra um nokkurra mánaða skeið árið 2009, var gestur í Silfri Egils í morgun. Þar kom Samherjamálið til umræðu sem hann sagði slæmt fyrir alla hlutaðeigandi aðila.

Munu rekja færslur Samherja

Sagðist Øygard nokkuð viss um að norski bankinn DNB muni rannsaka málið til hlítar sem og efnahagsbrotadeild norsku lögreglunnar. Í þeirri rannsókn verði færslur á reikningum Samherja hjá norska bankanum raktar og kannað hvort einhver skuggastarfsemi hafi verið á Kýpur þar sem félög Samherja voru skráð.

Gerir íslenskum fjárfestum erfiðara um vik

Øygard segist óttast að málið hafi víðtækari áhrif á íslenskt viðskiptalíf. Það skaði orðspor Íslands, kunni að hafa áhrif á aðgengi íslenskra fjárfesta á heimsmarkaði og draga úr erlendum fjárfestingum á Íslandi. „Það er mjög mikilvægt fyrir Ísland að taka til, taka forystu í þessu og þess vegna væru samhæfðar aðgerir mjög til bóta,“ segir Øygard.

Það sé ekki síst mikilvægt í ljósi eldri mála sem hafi komið upp og nefnir hann bankahrunið, Wintris-málið,  hlutfallslega miklar eignir Íslendinga í skattaskjólum og veru Íslands á gráum lista FATF, aðgerðahóps gegn peningaþvætti.

Magnús Geir Eyjólfsson
Síðast:
Þessi þáttur er í hlaðvarpi