Athugið þessi frétt er meira en 3 ára gömul.

Segir ákvörðun Kristjáns Þórs mikil vonbrigði

20.02.2019 - 14:43
Mynd með færslu
 Mynd: Skjáskot - RÚV
Guðmundur Ingi Guðbrandsson, umhverfis- og auðlindaráðherra, segir ákvörðun sjávarútvegsráðherra um áframhaldandi hvalveiðar vera mikil vonbrigði. Þá segir hann jafnframt að Kristján Þór hafi ekki rætt við sig áður en hann tók ákvörðunina. Hann telur þó að hann hafi rætt við aðra innan ríkisstjórnarinnar.

Sjávarútvegsráðherra heimilaði í gær áframhaldandi veiðar á langreyði og hrefnu til næstu fimm ára. Ákvörðunin byggir á ráðgjöf Hafrannsóknastofnunar og nýlegri skýrslu Hagfræðistofnunar Háskóla Íslands um þjóðhagsleg áhrif hvalveiða en skýrslan hefur hlotið mikla gagnrýni. 

Guðmundur Ingi hefur áður talað fyrir því að hvalveiðistefna Íslendinga verði endurmetin og hefur sagst vera ósannfærður um að hvalveiðar hér við land séu sjálfbærar. Vinstri græn hafa einnig gagnrýnt hvalveiðar á síðustu árum og hefur Katrín Jakobsdóttir, forsætisráðherra, til að mynda lýst því yfir á Alþingi að hún telji að hvalveiðar séu ekki sjálfbærar.

„Hún veldur mér miklum vonbrigðum þessi ákvörðun. Ég er ósammála því að ráðast í þessar hvalveiðar eins og komið hefur fram í máli mínu áður. Þarna lítur ráðherrann til ráðgjafar Hafrannsóknastofnunar sem er gott og vel en mér finnst vanta að líta til fleiri þátta þegar kemur að sjálfbærri nýtingu, eins og efnahagslegra og samfélagslegra þátta,“ segir Guðmundur. Þá gefur hann ekki mikið fyrir skýrslu Hagfræðistofnunar Háskóla Íslands. „Ég hef gagnrýnt opinberlega hvernig haldið var á málum þar. Mér fannst hún ekki vel unnin þannig að mér finnst ennþá vanta upp á að við sjáum þetta betur út frá öðrum þáttum.“

Aðspurður hvort Kristján hafi rætt við sig áður en hann tók ákvörðunina segir Guðmundur að svo hafi ekki verið. Sjávarútvegsráðherra hafi ekki ráðfært sig við umhverfisráðherra í aðdraganda ákvörðunarinnar. Kristján hefur sagt að hann hafi gert ríkisstjórninni grein fyrir því í fyrra vor með hvaða hætti hann hygðist vinna að því að undirbyggja ákvörðun í þessum efnum. Það yrði gert eftir ráðgjöf Hafrannsóknastofnunar. 

Guðmundur segist ekki muna hvort hann hafi mótmælt þeim áætlunum sjávarútvegsráðherra á þeim tíma þegar hann kynnti þær. „Nú bara man ég það ekki þegar hann sagði þetta á sínum tíma,“ segir hann. Guðmundur segist þó hafa sagt í fyrra sumar að hann teldi að það ætti að líta til fleiri þátta en einungis þeirra sem hafa með líffræðina og vistfræðina að gera. „Maður þyrfti að líta til fleiri þátta. Það eru náttúrulega þættir sem eru efnahagslegir og samfélagslegir, dýraverndunarséð líka. Þarna eru bara skiptar skoðanir. Ég er mótfallinn hvalveiðum og sú skoðun mín hefur komið fram. Ég hef ekki horfið frá henni þrátt fyrir þessa ákvörðun ráðherrans.“

„Svo það sé alveg á hreinu er þetta ákvörðun sjávarútvegsráðherra og í hans boði,“ segir Guðmundur. „Ég er bara ósammála þessu en valdheimildirnar eru hjá sjávarútvegsráðherra. Þannig að þetta eru bara ákvarðanir sem hann getur tekið.“