Sagði upp vegna viðbragða við sóttkví

26.03.2020 - 17:53
Mynd með færslu
 Mynd: Bjarni Rúnarsson - RÚV
Dýralæknir hefur sagt upp þjónustusamningi sínum við Húnavatnssýslur. Hún segir viðbrögð Matvælastofnunar yfir því að þurfa að fara í sóttkví hafa fyllt mælinn en aðdragandinn sé langur. Matvælastofnun segir það sama ganga yfir alla.

Ingunn Reynisdóttir hefur séð um dýralækningar fyrir Matvælastofnun í Húnavatnssýslum frá 2012 og er eini dýralæknirinn sem býr á svæðinu. Hún segir á Facebook-síðu sinni frá því að hún hafi nú sagt upp þjónustusamningi sínum við Húnavatnssýslur.

Viðbrögð við sóttkví fylltu mælinn

„Ástæðan fyrir uppsögn er búin að vera að hlaðast upp á löngum tíma þar sem maður hefur alltof stóru svæði til að sinna, engar afleysingar þannig að maður hefur ekki fengið sumarfrí í 8 ár.“ Þá hafi veturinn verið mjög erfiður með atvikum og önnum sem enginn dýralæknir ætti að þurfa að hönlda einn.

„En dropinn sem fyllti mælinn var viðmótið og svörin sem ég fékk frá Matvælastofnun þegar ég tilkynnti þeim að ég væri komin í fyrirskipaða sóttkví vegna COVID-19. Mér tjáð að ég þyrfti að útvega afleysingu og greiða fyrir hana sjálf. Fæ sem sagt engar þjónustugreiðslur/laun á meðan“. Þá sé ekkert útlit fyrir að breyting verði á starfsumhverfi þar sem samningaviðræður við Matvælastofnun og ráðuneyti séu ekki að skila neinu. Hún standi því með sjálfri sér í þetta skiptið og ætli að starfa sjálfstætt sem dýralæknir. 

Samningur er samningur

Í þjónustusamningum dýralækna er ákvæði um að dýralæknar eigi í forföllum eða veikindum að útvega afleysingu sjálfir. Takist það ekki sé hægt að leita aðstoðar hjá Matvælastofnun við að finna hana. Meðan á forföllum stendur fá dýralæknar ekki greidd laun. 

Sigurborg Daðadóttir, yfirdýralæknir hjá MAST segist hafa útvegað afleysingu í gær. Samningur sé samningur, það sama eigi við hér og um aðra og Ingunni hafi verið bent á að leita til Vinnumálastofnunar. „Ríkisstjórnin hefur komið með útspil sem á að gagnast þeim sem eru í þessari stöðu, við hljótum að fylgja því.“

Samningar renna út í maí

Ingunn segist í samtali við fréttastofu að hafa haldið að aðstæður væru öðruvísi í dag en vanalega. Ómögulegt sé að finna afleysingu sem sé ástæða þess að hún hafi einungis fengið nokkra daga í frí frá því hún byrjaði. „Þetta er búið að vera í samningum síðan 2011 og við höfum bara alls ekki fengið því breytt, þjónustudýralæknar.“ Samningar renni hins vegar út fyrsta maí og enginn dýralæknir muni skrifa undir óbreyttan samning.