Safna gönguleiðum á Norðurlandi í einn banka

02.07.2019 - 11:31
Mynd með færslu
 Mynd: Birgir Þór Harðarson
Markaðsstofa Norðurlands safnar GPS-merktum gönguleiðum sveitarfélaga á Norðurlandi og ætlar að veita aðgang að þeim á vefnum. Verkefnið er helst ætlað til leiðsagnar fyrir erlenda ferðamenn þó það verði einnig aðgengilegt Íslendingum.

Í bréfi sem sent hefur verið til allra 20 sveitarfélaganna á Norðurlandi er óskað eftir upplýsingum um merktar og viðurkenndar gönguleiðir. Björn H. Reynisson, verkefnastjóri áfangastaðaáætlana hjá Markaðsstofu Norðurlands, fer fyrir verkefninu. 

„Við erum í raun og veru að óska eftir lýsingu á gönguleiðunum og öllum þessum grunnupplýsingum um það hvernig leiðin er upp byggð og hversu löng hún er og svo framvegis,“ segir Björn. „En auk þess ætlum við að biðja alla um að leiðin verði trökkuð, eða GPS-hnituð, til þess að það verði þá hægt að setja hana inn á miðlægan gagnagrunn á netinu.“

Gönguleiðir á Norðurlandi hafa margar verið merktar á hin ýmsu kort og í bækur, en Björn segir að þær hafi aldrei verið teknar saman með þessum hætti. Og hann vonar að hægt verði að sækja gönguleiðirnar ókeypis á netinu strax um næstu áramót.

„Okkur langar í raun og veru að gera þessar gönguleiðir aðgengilegar fyrir, í raun og veru, alla en einna helst erlenda ferðamenn,“ segir Björn. Einfalt verður svo að sækja gögnin og hlaða þeim jafnvel inn í Google Maps eða aðrar kortaþjónustur á vefnum.

Verkefnið verður unnið í samvinnu við sveitarfélögin enda gerir Björn þær kröfur að leiðirnar liggi um svæði sem leyfilegt er að ganga um og að öll leyfi landareigenda séu fyrir hendi. Einnig er óskað eftir upplýsingum um hversu erfiðar leiðirnar eru. Viðbrögðin frá sveitarfélögunum hafa verið góð.

„Margir hafa viljað hafa allar sínar leiðir á svæðinu en það er auðvitað töluvert mikil vinna. En ég hef fengið bara töluvert góð viðbrögð við þessu,“ segir Björn.

birgirthh's picture
Birgir Þór Harðarson
Fréttastofa RÚV
Síðast:
Þessi þáttur er í hlaðvarpi