Athugið þessi frétt er meira en 3 ára gömul.

RÚV kallar eftir lögum í Söngvakeppnina 2019

Mynd með færslu
 Mynd: RÚV

RÚV kallar eftir lögum í Söngvakeppnina 2019

20.09.2018 - 09:20

Höfundar

Frá og með deginum í dag er hægt að senda inn lög í Söngvakeppnina 2019. Keppnin verður haldin í febrúar og mars á næsta ári. Sigurlagið verður fulltrúi Íslands í Söngvakeppni evrópskra sjónvarpsstöðva, Eurovision, í Tel Aviv í Ísrael, 14.-18. maí 2019. Um tvö hundruð milljónir manna fylgdust með Eurovision í fyrra.

Úrslit Söngvakeppninnar 2019 verða í Laugardalshöll, líkt og undanfarin ár. Sem kunnugt er nýtur keppnin gríðarlegra vinsælda meðal þjóðarinnar og er einn af hápunktum ársins í íslensku sjónvarpi. Síðustu ár hafa 12 lög verið valin til þátttöku í Söngvakeppninni úr innsendum lögum. Sérstök dómnefnd, skipuð fulltrúum frá FTT, FÍH og RÚV, hefur farið yfir lögin og mælt með lögum í keppnina.

Leitað til höfunda

Tíu lög verða í Söngvakeppninni 2019 og hefur fyrirkomulaginu við valið á þeim verið breytt. Reyndir og vinsælir lagahöfundar verða ráðnir til að semja hluta laganna en auk þess verður valið úr innsendum lögum líkt síðustu ár. Þar til viðbótar verður staðið fyrir sérstakri söngsmiðju fyrir upptökustjóra, höfunda og flytjendur sem Félag tónskálda og textahöfunda (FTT) hefur veg og vanda af í samstarfi við RÚV. Til greina kemur að nýta afrakstur þeirrar vinnu við val á lögum í keppnina.

Lee Proud listrænn stjórnandi

RÚV hefur ráðið breska danshöfundinn Lee Proud sem listrænan stjórnanda og danshöfund keppninnar. Hann er danshöfundur í þekktum söngleikjum um allan heim og hefur undanfarin ár hefur hann stýrt nokkrum af stærstu söngleikjunum hér á landi s.s. Mary Poppins, Billy Elliot og Mamma mía. Samúel J. Samúelsson verður tónlistarstjóri líkt og í fyrra.

Ragnhildur Steinunn Jónsdóttir aðstoðardagskrárstjóri RÚV, sem situr í framkvæmdastjórn keppninnar, segist binda vonir við að með nýju fyrirkomulagi verði lögin í keppninni fjölbreyttari og sterkari. „Keppnin stækkar frá ári til árs og við höfum verið gríðarlega ánægð með þróun hennar. Í ár ákváðum við að breyta fyrirkomulaginu og við teljum að það skili fjölbreyttari, skemmtilegri og enn betri lögum,” segir Ragnhildur Steinunn. Hún bætir við að það sé mikill fengur í Lee Proud.

Úrslitin í Laugardalshöll

Undankeppnir verða í Háskólabíói 9. og 16. febrúar og úrslitakeppnin verður svo haldin með pomp og prakt í Laugardalshöll 2. mars. Síðustu ár hafa erlendar stórstjörnur úr Eurovision komið fram í Höllinni, m.a. Robin Bengtsson, Emily deForest, Alexander Rybak, Loreen og Måns Zelmerlöw. Til stendur að halda áfram á þessari braut og bjóða enn einni stjörnunni á úrslitakvöldið í mars.

Opnað fyrir umsóknir á songvakeppnin.is

Lagahöfundar geta sent lög í Söngvakeppnina 2019 á vefinn, songvakeppnin.is. Umsóknarfrestur rennur út mánudaginn 22. október. Í byrjun janúar verður tilkynnt hvaða lög taka þátt í þessum stærsta sjónvarpsviðburði ársins. Ný innsendingargátt hefur verið tekin í notkun og þarf rafræn skilríki til að komast inn á hana. Þetta er gert til að gæta fyllsta öryggis í meðferð persónuupplýsinga.

RÚV hvetur alla laga- og textahöfunda, sem vilja taka þátt í Söngvakeppninni 2019 og halda áfram að móta tónlistarsögu Íslands, til að senda inn sitt lag. Höfundum er sérstaklega bent á að Söngvakeppnin snýst um fjölbreytni. Allar tegundir tónlistar eru boðnar velkomnar.

Reglur Söngvakeppninnar 2019 má finna hér.