RÚV okkar allra
Hér upplýsum við um starfsemina, bjóðum upp á samtal og svörum spurningum þínum

RÚV á tímum COVID-19

Mynd með færslu
 Mynd: RÚV
RÚV hefur mikilvægu og skýru hlutverki að gegna í almannavarnaástandi eins og nú ríkir. Það á við um miðlun frétta, upplýsinga og ekki síður afþreyingarefnis af ýmsu tagi, Öllum þeim fjölbreyttu verkefnum sem þessu fylgja hefur starfsfólk RÚV sinnt af mikilli fagmennsku og elju undanfarnar vikur og mánuði.

 

Framundan eru enn óvenjulegri tímar með fordæmalausu samkomubanni og ýmsum öðrum mikilvægum ráðstöfunum. Þær ráðstafanir eru tímabærar og nauðsynlegar og munu tryggja að við náum tökum á þeirri stöðu sem uppi er. Við hjá RÚV höfum verið að undirbúa okkur undir þessa stöðu síðustu daga og vikur í samstarfi við ýmsa aðila, bæði til þessa að tryggja órofna starfsemi RÚV á tímum sem þessum og skipuleggja og undirbúa einnig hvernig við getum enn bætt og styrkt okkar upplýsingamiðlun, fræðslu, skemmtun og afþreyingu.

Margt er í undirbúningi sem þegar er byrjað að kynna. Við munum með fjölbreyttum hætti aðstoða skólabörn og fjölskyldur við að ramma inn daginn nú þegar skólahald verður takmarkað og gera allskyns fræðsluefni aðgengilegt, við erum að framleiða og setja í dreifingu á næstu dögum aðgengileg örmyndbönd með lykil-fræðsluatriðum sem tengjast stöðu mála, höfum fengið til liðs við okkur þýðendur til að þýða fréttir og upplýsingar yfir á pólsku til viðbótar við enskar þýðingar. Morgunútvarp Rásar 1 og 2 hefur verið sameinað og er útsendingunni sjónvarpað að auki. Fréttaskýringaþáttur Kveiks um COVID-19 var á dagskrá í gær og fer umræðuþáttur um COVID-19 í loftið í kvöld. Við erum í samstarfi við Þjóðleikhúsið með verkefnið Ljóð fyrir þjóð og erum í samtali við fleiri menningarstofnanir. Við munum auka við alla útsenda dagskrá, þar á meðal af vinsælu eldra efni. Við erum einnig að huga að ýmsu sem snýr að leikfimi og hreyfingu, ekki síst þeirra sem nú komast ekki í hefðbundna sjúkraþjálfun eða leikfimi, og sömuleiðis með jóga, hugleiðslu og öðru því sem hjálpar við að byggja upp og viðhalda andlegum styrk.

 

18.03.2020 kl.15:58
Samskiptasvið RÚV
Birt undir: Í umræðunni