Athugið þessi frétt er meira en 3 ára gömul.

Ratcliffe segist vilja vernda íslenska laxinn

06.08.2019 - 08:10
Mynd með færslu
 Mynd: Einar Falur
Breski auðkýfingurinn Jim Ratcliffe, sem hefur fest kaup á jörðinni Brúarlandi 2 í Þistilfirði, segir að kaupin séu hluti af yfirstandandi aðgerðum til verndar íslenska laxastofninum. Markmiðið sé að laxveiðar á Íslandi verði þær bestu og sjálfbærustu sem fyrirfinnist í heiminum.

Þetta kemur fram í fréttatilkynningu sem Ratcliffe sendi frá sér í morgun.

Þar segir að Ratcliffe hafi útvíkkað áætlanir sínar um fjárfestingu í staðbundnum verkefnum til verndar laxinum í helstu laxveiðiám Norðausturlands. Markmið hans sé að vernda nærliggjandi landsvæði og viðkvæmt vistkerfi svæðisins í heild.

„Ofveiði ógnar stofni Norður-Atlantshafslaxins og honum fækkar hvarvetna í ám. Norðurausturhluti Íslands er einn af fáum uppeldisstöðvum laxins sem sloppið hefur hingað til og ég vil gera hvað ég get til verndar svæðinu,“ er haft eftir Ratcliffe í tilkynningunni. Hann leggi áherslu á sjálfbæra náttúrvernd og hafi þegar fjárfest í landareignum í Vopnafirði og laggst þar á árar með öðrum landeigendum og íbúum við vernd einstæðs náttúrfars svæðisins.

„Stendur hjarta mínu nær“

„Hluti af aðgerðum til verndar laxinum sem áætlaðar eru á næstu fimm árum snýr að því að útvíkka hrygningarsvæði laxins með byggingu nýrra laxastiga í Hafralónsá, Hofsá og Miðfjarðará í Vopnafirði. Þá er fyrirhuguð umfangsmikil slepping á frjóvguðum hrognum í þessum ám, auk Selár. Þetta er í samræmi við almenna veiðireglu ánna um að veiddum fiski sé sleppt aftur,“ segir í tilkynningunni.

Í samstarfi við nærsamfélagið á Norðausturlandi vinni Ratcliffe einnig gegn jarðeyðingu og að bættu heilsufari vistkerfis ánna, með fjárfestingu í endurræktun skóga og endurheimt gróðurfars.

Þá kemur ennfremur fram að Ratcliffe standi að ítarlegri langtímarannsókn á afkomu íslenska laxins í ánum og í norðanverðu Atlantshafi. Rannsóknir fari fram í samstarfi við Hafrannsóknastofnun og háskóla innan lands og utan.

„Norðausturland stendur hjarta mínu nær. Eftir því sem heimsóknunum þangað fjölgar eykst löngun mín til þess að gefa svæðinu til baka, til að hjálpa Norður-Atlantshafslaxinum, sem er ógnað, og einnig til að styðja við samfélagið nærri ánum. Mín skoðun er að sjálfbær langtímanálgun með starfsemi sem stendur undir eigin fjármögnun skipti sköpum, geri laxinum kleift að þrífast vel, ekki bara um skemmri tíma heldur um alla framtíð,“ er haft eftir Ratcliffe.

Einstætt umhverfi

Verndaráætlunin feli í sér sér nýja fjárfestingu og standsetningu veiðiskála, þar sem að komi iðnaðarmenn og fyrirtæki á svæðinu. Um leið séu bændur á markvissan hátt hvattir til að halda búsetu á jörðum sem keyptar hafa verið, til að viðhalda hefðbundum landbúnaði og jarðgæðum nærri ánum, og styðja með búsetu sinni með beinum hætti við nærsamfélagið.

„Kaupin á meirihlutaeign í jörðinni Grímsstöðum, þar sem meðeigendur eru íslenska ríkið og smærri hluthafar, eru birtingarmynd heildstæðrar nálgunar Jim Ratcliffe á þetta mikilvæga verndarstarf. Þótt svæðið sé að mestum hluta óbyggt mýrlendi, er á hálendi þess að finna helstu vatnasvið ánna á Norðausturströndinni. Markmið kaupanna voru að vernda og viðhalda þessu einstæða umhverfi hálendisins,“ segir í tilkynningunni.

Árangur af endurbótum og fyrri fjárfestingum Ratcliffes í Selá sé þegar sýnilegur, en þar hafi veiði aukist frá ári til árs. Þetta séu jákvæð teikn um að verndaráætlun hans þoki hlutum í rétta átt, og gefi náttúrunni færi á að dafna.

„Náttúruvernd hefur alltaf verið og verður áfram eini tilgangur aðkomu minnar á Norðausturlandi Íslands. Ég vil leggjast á árar við að viðhalda laxastofnunum þar, og vinna náið með bændum og byggðarlögum. Von mín er að úr starfinu verði til sjálfbær starfsemi í sátt við náttúruna, sem einnig komi lífríki svæðisins og samfélaginu öllu til góða,“ segir Ratcliffe.