Athugið þessi frétt er meira en 1 ára gömul.

Raforkukerfið enn laskað síðan í desember

13.02.2020 - 12:10
Mynd með færslu
 Mynd:
Raforkukerfið er enn laskað á einhverjum stöðum eftir óveður í desember og því gæti þurft minna til en ella til að röskun verði á dreifingu rafmagns, að sögn Helgu Jóhannsdóttur, framkvæmdastjóra rekstrarsviðs Rarik. Þar á bæ, líkt og víða um allt landið, er fólk að undirbúa sig fyrir ofsaveður sem spáð er á morgun.

Búið er að fara yfir mönnun á öllum landsvæðum, segir Helga og vel hefur verið farið yfir stöðuna á varaafli og staðsetningu á færanlegum vélum. Allir starfsmenn í vinnuflokkum Rarik verða á bakvakt og tilbúnir þegar veðrið skellur á. 

Raforkukerfið er enn að einhverju leyti laskað síðan í óveðrinu í desember og því er fólk meira á tánum. Það gæti því þurft minna til að röskun verði á dreifingu rafmagns. Sums staðar hefur verið gert við til bráðabirgða og það hefur gerst eftir jól að þegar farið hefur að blása hefur komið í ljós eitthvað sem þarf að laga á ný.

Viðbúnaðurinn er sérstaklega mikill á Suður- og Suðausturlandi, Vesturlandi og Norðvesturlandi. Allt landið er undir og því ekkert landsvæði sem ekki þarf að hafa áhyggjur af, að sögn Helgu.  

Neyðarstjórn Landsnets lýsti í morgun yfir óvissuástandi vegna óveðursins. Þar hafa allar viðbragðsáætlanir verið virkjaðar og hætta er á margháttuðum truflunum í flutningskerfinu vegna aftaka vinds af austri, þar sem ísing og selta sett strik í reikninginn.