Athugið þessi frétt er meira en 2 ára gömul.

Passamyndir sem listform

Mynd: Sigurður Unnar Birgisson / Passamyndir

Passamyndir sem listform

14.09.2019 - 11:27

Höfundar

Kristján Guðjónsson

dagskrárgerðarmaður

Senda skilaboð

Facebook síða ljósmyndastofunnar Passamynda hefur vakið nokkra athygli að undanförnu, en þar birtir Sigurður Unnar Birgisson, starfsmaður Passamynda, reglulega portrettmyndir af vel völdum viðskiptavinum - auðvitað með góðfúslegu leyfi. Andlitin er jafn ólík og þau eru mörg en hvert einasta segir ríkulega sögu.

Guðmundur kom vegna endurnýjunar á ökuskírteini. Hann er á leið til Tenerife í mánuð með frúnni. Fimm stjörnu hús með tveimur sundlaugum.

Helga Guðmundsdóttir kom nýverið vegna myndar í ökuskírteini. Hún sagði mér að hún ætti heima nálægt kirkjugarði. Hún heimsótti hann æ sjaldnar vegna tölvugrúsks á ebay í tengslum við áhugamál sitt.

Hörður kom rétt í þessu í Passamyndir vegna endurnýjunar á ökuskírteini. Hann er með meirapróf.

Þannig hljóma þrjár þeirra örsagna sem finna má á Facebook-síðu ljósmyndastofunnar Passamynda. Þar birtir Sigurður Unnar reglulega portrettmyndir af vel völdum viðskiptavinum auk örfárra orða.

Mynd: Sigurður Unnar Birgisson - Passamyndir

Sigurður Unnar Birgisson, ljósmyndari

„Við sem mannfólk höfum rosalega gaman af því að horfa á andlit og okkur er óhjákvæmilegt að búa til sögur. Þannig að þetta fer vel saman, að segja sem minnst en samt að opna.”

Með þessu fá ljósmyndirnar annað framhaldslíf en bara sem auðkenni á skírteinum eða vegabréfsáritunum viðskiptavinanna. „Það er svolítið kaldhæðnislegt að vanda sig svona mikið að reyna að ná góðri passamynd, því það er svo svakalega lítið lagt í skírteinin í dag. Áður fyrr voru myndirnar bara límdar á þau, en nú skilar fólk inn myndum, þær eru skannaðar inn, og svo sendar út í framleiðslu í Ungverjalandi - ef ég man rétt. En þegar skírteinin koma þaðan er fólk nánast óþekkjanlegt,” segir Sigurður Unnar.

Fjallað var um passamyndir í Lestinni á Rás 1.